"Биылғы қыркүйекте 11 жастағы қыздарға адам папиллома вирусына қарсы вакцина салу жоспарланған. Адам папиллома вирусына қарсы вакцинация үшін адам папиллома вирусының ең онкогенді түрлерінен қорғайтын АҚШ-тың 4 валентті "Гардасил" вакцинасы қолданылады. Адам папиллома вирусына қарсы вакцинация онкологиялық аурулардың, соның ішінде жатыр мойны обырының ауыртпалығын азайтады және жалпы халықтың денсаулық көрсеткіштерін жақсартуға, онкологиялық аурулардан болатын сырқаттанушылық пен өлім-жітімді төмендетуге ықпал етеді",деді Зауре Ахметова Орталық коммуникациялар қызметінде өткен брифингте.

Спикер елімізде жыл сайын жатыр мойны обырының 1900-ге жуық жаңа жағдайы тіркелетінін жеткізді. Өкінішке қарай, жыл сайын 600-ден астам әйел осы ауру түріне қайтыс болады, деп жалғастырды ол.

"Бүгінде адам папиллома вирусын жұқтырмаудың және жатыр мойны обырының алдын алудың жалғыз әдісі – вакцинация. 135 ел адам папиллома вирусына қарсы вакцинацияның тиімділігін ескере отырып, бұл вакцинаны ұлттық иммундау бағдарламаларына енгізді. Оның ішінде Өзбекстан, Қырғызстан, Тәжікстан, Түрікменстан мемлекеттері бар",-деді ДСМ Санитариялық-эпидемиологиялық бақылау комитеті төрағасының орынбасары.