Қарттар амандығы – қоғам айнасы

Мамандардың айтуынша, тұрмыстық зор¬лық-зомбылықтың кез келген түрі әрбір сегізінші отбасында бар. Әрбір үшінші отбасында тұрмыстық зорлық-зомбылық болса, егде жастағы адамдар да экономикалық, физикалық, психологиялық зорлық-зомбылыққа тап болады.

Қарт адамдарға жасалатын зорлық-зомбылық тек физикалық қысыммен шектелмейді. Ол бірнеше түрлі формада көрініс табуы мүмкін:

Мысалы,психологиялық қысым: қорлау, менсінбеу, жалғыздықта қалдыру деп есептелсе,экономикалық зорлыққа: зейнетақысын иемдену, мүлкін рұқсатсыз пайдалану деп көрсеткен. Ал медициналық немқұрайлылық: тиісті дәрігерлік көмектен айыру немесе дәрі-дәрмегін бермеу,әлеуметтік оқшаулау: қоғамнан, отбасынан алыстату болып табылады.

Өкінішке қарай, қазіргі қоғамда отбасындағы кемсіту мен қорқыту қалыпты жағдайға айналды, тұрмыстық зорлық-зомбылық қылмыстарына құлақ үйренді.

Бүгінгі таңда бұл күрделі ахуал жүректі сыздатып, елдің ертеңіне алаңдаушылық тудырып отыр. Қорғансыздың көз жасына бейжай қарау – адамгершілікке жат. Сондықтан бұл түйткілдің шешімі – тек заңмен ғана емес, жүрекпен, бірлікпен, санамен күресу. Отбасында тыныштық болса – қоғамда тұрақтылық болады.Қарттарға жасалатын зорлық-зомбылықты болдырмау – тек отбасының емес, бүкіл қоғамның міндеті.

Қарттар – біздің өткеніміздің айнасы, болашағымыздың бағдары. Оларға жасалған зорлық – тек жеке адамға ғана емес, бүкіл қоғамның ар-намысына жасалған қиянат. Сондықтан әрбір азамат, әрбір отбасы, әрбір мемлекеттік орган бұл мәселеге бей-жай қарамай, бірлесіп әрекет етуі керек. Егде жастағы адамдарға қамқор болу – ізгі қоғамның белгісі.

Қарияға құрмет – бала тәрбиесінің де айнасы. Балалар мен жастар ата-әжесіне қарап мейірімділік пен сыйластықты үйренеді. Сондықтан отбасы ішінде қарт адамның орны ерекше болуы тиіс.

Қорыта айтқанда, қарияларға қатыгездікке жол бермеу – әрбір азаматтың борышы. Олар бізге өмір берген буын. Ал біз оларға құрмет көрсету арқылы өз болашағымызға жол ашамыз. Қарияны сыйлау – адамгершіліктің белгісі.