Фестивальге Қазақстан Композиторлар одағының құрметті төрағасы, Мемлекеттік сыйлықтың лауреаты, ҚР Журналистер одағының мүшесі, филология ғылымдарының кандидаты, бірнеше опералар мен симфониялық шығармалардың авторы Балнұр Қыдырбек, Қазақстан Композиторлар одағының төрағасы, Қазақстанның еңбек сіңірген қайраткері, Қазақ ұлттық өнер университетінің профессоры, бірнеше опералар мен симфониялық шығармалардың авторы Серікжан Әбдінұров, Қазақстан Композиторлар одағының мүшесі, Құрманғазы атындағы Қазақ ұлттық консерваториясының профессоры, дәу­лескер күйші, Қазақстанның еңбек сіңірген қайраткері, бірнеше аспаптық шығармалардың авторы Ермұрат Үсенов, Қазақстан Композиторлар одағының мүшесі, Құрманғазы атындағы Қазақ ұлттық консерваториясының профессоры, Қазақстанның еңбек сіңірген қайраткері, бірнеше опералар мен симфониялық шығармалардың авторы Бейбіт Дәлденбай қатысты. Құрметті қонақтар қатарында Қазақстан Композиторлар одағының мүшесі, ҚР Мәдениет қайраткері, ҚР Білім беру ісінің құрметті қызметкері, Құрмет орденінің иегері, профессор, Қазақ ұлттық консерваториясының «Халық музыкасы» факультетінің деканы Төлепберген Тоқжанов бар. Сондай-ақ Қазақстан Композиторлар одағының мүшесі, ҚР Мәдениет саласының үздігі, Қазақ ұлттық өнер университетінің өнертану ғылымдарының докторы, скрипка кафедрасының профессоры Дана Жұмабекова, Қазақстан Композиторлар одағының басқарма мүшесі, Батыс Қазақстан облыстық филармониясының Дәулеткерей атындағы қазақ халық аспаптары оркестрінің көркемдік жетекшісі және бас дирижері, мемлекеттік «Дарын» жастар сыйлығының лауреаты, «ҚР Мәдениет саласының үздігі», «Құрмет» орденінің иегері Еркін Нұрымбетов, Қазақстан Композиторлар одағының мүшесі, ҚР Мәдениет қайраткері, «Ы.Алтынсарин» белгісінің иегері, Қазақстан Композиторлар одағының Ақтөбе облысы бойынша филиалының жетекшісі Аманжол Исмагулов сынды музыка өнерінің майталмандары қатысты.

Фестивальдің жалғасы келген меймандардың қатысуымен шеберлік сағатына ұласты. Онда мамандар музыкалық бағыттардың дамуы туралы ойларымен бөлісіп қоймай, шығармашылық байланысты одан әрі кеңейту туралы өзара келісім жасады. Сондай-ақ музыкалық мәдениетті дамыту жайында сөз қылды. Сонымен бірге республиканың түкпір-түкпірінен келген Композиторлар Одағының басшылары мен мүшелеріне Қорқыт ата атындағы аудандық өнер мектебінің кешегісі мен бүгіні баяндалып, осы жылдар аралығында жеткен жетістігі мен атқарылған ауқымды жұмыстары таныстырылды.

Келесі күні Қазалы ауданы әкімдігінің баспасөз орталығында Қазақстан Республикасы Композиторлар одағының мүшелерінің және БАҚ өкілдерінің қатысуымен баспасөз брифингі өтті. Онда Қазақстан Композиторлар Одағының төрағасы, Қазақстанның еңбек сіңірген қайраткері Серікжан Құттымбетұлы, Қазақстан Композиторлар Одағының құрметті төрағасы, ҚР Мемлекеттік сыйлығының лауреаты Балнұр Балғабекқызы, Қазақстан Композиторлар одағының тарихы жайында сөз етіп, мерейтой аясында өткізіліп жатқан ауқымды шараларға шолу жасады. Ал Қазалы ауданының Қорқыт Ата атындағы өнер мектебінің директоры, Қазақстан Композиторлар Одағының мүшесі Сәукен Әлмамбетұлы 60 жылдық тарихы бар Қорқыт ата атындағы өнер мектебінің бүгінгі тынысына тоқталды.

Брифинг барысында өзге қаты­сушылар да пікір білдіруден қалыс қалмай, одақтың қолдауымен өтіп жатқан ауқымды фестиваль Қазалы ауданында алғаш рет ұйымдастырылып жатқанын тілге тиек етті.

Екі күнге созылған «Қазақстан Композиторлар одағы шақырады!» атты ауқымды музыкалық фестиваль Қазақстан Композиторлар Одағының 85 жылдығы және Қорқыт ата атындағы өнер мектебінің 60 жылдық мерейтойына арналған «Жаса, қазақ өнері!» атты гала-концертіне ұласты.

Қатар келген қос қуанышты атап өтуге арналған мерекелік концерт Роза Бағланова атындағы аудандық мәдениет орталығында өтті. Керемет кеште аудан әкімі Мейрамбек Шермағанбет сөз сөйлеп, Қазақстан Композиторлар одағының 85 жылдығы және Қорқыт ата атындағы өнер мектебінің 60 жылдық мерейтойымен құттықтады.

– Биыл қазақ кәсіби музыкасының тұрақтап дамуына, кешегі халық мұрасын бүгінге дейін жеткізіп, тарихы қазақ халқының өмірімен тығыз байланысып жатқан Қазақстан Композиторлар одағының құрылғанына 85 жыл толып отыр. Ал біздің киелі өңірдегі талай дарындарды өнер әлеміне қадам бастырған Қорқыт ата атындағы өнер мектебіне 60 жыл. Айтулы мерейтойларда ел мәдениеті мен өнерінің, қазақ музыка өнерінің дамуына, бүгінгі ұрпаққа насихаттау жолында аянбай еңбек етіп жүрген Қазақстан Композиторлар одағы мүшелері мен барша өнерпаздарға шынайы алғысымды білдіремін, – деді аудан әкімі.

Аталған шарада аудан әкімі Қазақстан Композиторлар Одағының төрағасы Серікжан Құттымбетұлы мен барша одақ мүшелеріне облыс әкімі мен аудан әкімінің Алғыс хатын табыстады. Сонымен қатар Композиторлар Одағы мен өнер мектебі ұжымына облыстық мәдениет, архивтер және құжаттама басқармасы мен облыстық білім басқармасы басшыларының ақ жарма тілегін жеткізіп, Композиторлар одағы мен өнер мектебінің ұжымына алғаусыз алғысын білдірді.

Тартымды кештің шымылдығы Қорқыт ата атындағы өнер мектебінің хореография класы оқушыларының «Қазақ биімен» түрілді. Екі бөлімнен тұратын концерттік бағдарламаның алғашқы кезеңінде Қорқыт ата атындағы өнер мектебінің оқушылары аты аңызға айналған композиторлармен қатар Композиторлар одағы мүшелерінің танымал шығармаларын орындады. Ал екінші бөлімде «Мырза» халық аспаптары оркестрі көзі қарақты көрерменге көтеріңкі көңіл күй сыйлады. Айта кеткен жөн, халық аспаптық оркестріне Қазақстан Композиторлар одағының мүшесі, Қорқыт Ата атындағы Қызылорда универистеті педагогика және дәстүрлі өнер институтының құрметті профессоры, ҚР Білім беру ісінің үздігі, ҚР Мәдениет қайраткері, Сыр елінің кәсіби халық аспаптары оркестрінің және камералық оркестрдің негізін қалаушы, облыстық филармония жанындағы Тұрмағанбет атындағы халық аспаптары оркестрінің бас дирижері, «Құрмет» орденінің иегері, Қазақстан Композиторлар одағының Қызылорда облысы бойынша филиалының жетекшісі Кеулімжай Ботабаев дирижерлік етті.

Қазақстан Композиорлар одағының 85 жылдығы аясында ұйымдастырылған республикалық тәжірибе алмасу мақсатындағы музыкалық фестиваль осылайша тәмамдалды. Әйтсе де, мерейтой аясындағы мерекелік іс-шаралар легі алдағы уақытта да жалғасын таба бермек.