Қазалы Qazaly.kz ақпараттық агенттігі
» » Жаңалыққа толы жаңа мүмкіндіктер

Жаңалыққа толы жаңа мүмкіндіктер

Жуырда аудан әкімдігінің мәжіліс залында Елбасы Н.Назарбаевтың «Президенттің әлеуметтік бес бастамасы» атты халыққа Үндеуіне байланысты облыс әкімі Қырымбек Көшербаевтың қатысуымен телекөпір өтті. Оған аудан әкімінің орынбасары Ә.Жарылқағанов, сондай-ақ, аудандағы түрлі мекеме басшылары, әлеуметтік сала қызметкерлері, тұрғындар қатысты.
Телекөпірде аймақ басшысы Елбасының бес әлеуметтік бастамасы миллиондаған қазақстандықтардың мүддесіне оң әсер етіп, әлеуметтік саланы жаңартуға бағытталғанын атап өтті.
«Президенттің айтуынша, жұмыс істейтін әрбір қазақстандық төмендегідей шарттар бойынша ипотекалық несие алу мүмкіндігіне ие болады. Бұдан басқа, өздеріңіз білесіздер, біз алдымызға облыстың әлеуметтік аз қамтылған тобын мейлінше қолжетімді баспанамен қамтамасыз ету міндетін қойып отырмыз. Осы мақсатта 2017 жылы 3 жылға арналған тұрғын үй құрылысына бағытталған «Орда» «жол картасын» әзірледік», – деді аймақ басшысы.
Сондай-ақ, облыс әкімі бастапқы жарна ретінде есепшотында 20 пайыз қаржысы жинақталған несие алушылардың санын анықтау үшін салымшыларға талдау жасауды тапсырды.
«Жоғары білім алудың қол жетімділігі мен сапасын арттыру» атты үшінші бастама аясында Қырымбек Көшербаев Қызылордадағы мектеп бітірушілердің Ресей Үкіметінің гранты есебінен білім алып жатқанын атап өтті.
«Жуырда Ресей Федерациясының федералдық бюджеті есебінен Ресей мемлекеттік аграрлық университетінің К.А.Тимирязов атындағы Мәскеу ауылшаруашылық академиясына бакалавр бағдарламасымен «Білім саласындағы ақпараттық жүйелер» мамандығына сегіз талапкерді және магистратура бағдарламасы бойынша «Инженерлік білім беру жүйесін ақпараттандыру» мамандығына жиырма талапкерді жаңадан оқуға қабылдау жөнінде келісімге қол жеткіздік. Сонымен бірге, жыл сайын облыс әкімінің грантымен аз қамтылған және көпбалалы отбасылардан шыққан 100-ге жуық дарынды ауыл балаларын аймаққа қажетті мамандықтар бойынша еліміздің жетекші жоғары оқу орындарына жіберудеміз. Біздің жастарымыз талантты және біз оларды жаңа қоғамның қажетті мамандықтарына бағыттауымыз қажет», – деді облыс әкімі.
Сондай-ақ, биылғы жылы шағын несиелендіруге 3 млрд теңгеден астам қаржы бағыттау жоспарлануда. Бұл кемінде 500-ге жуық жобаны несиелендіруге мүмкіндік береді.
Естеріңізге сала кетейік, 2018 жыл аймағымызда «Жаппай кәсіпкерлікті дамыту» жылы болып жарияланды.
«Кәсіпкерлікті қолдау мақсатында облысқа қосымша қаражат тартуды тапсырамын», – деді аймақ басшысы.
Астана қаласының газдандыру жөніндегі Бесінші бастамасы аясында Мемлекет басшысы Қараөзек (Қызылорда облысы) – Жезқазған – Қарағанды – Теміртау – Астана бағытындағы магистральды газ құбырын салу жобасын жүзеге асыруды ұсынды.
Аймақ басшысы Қызылорда облысында бұл жобаны жүзеге асырудың ерекше маңыздылығын атап өтті.
«Бүгінгі күні Елордамыз Астананы газдандыру біздің Сыр өңірінен бастау алатыны біз үшін үлкен қуаныш. Біз бұл мәселені бірнеше жыл зерттедік. Нақты айтар болсақ, бұл – сметалық құны 370 млрд теңге болатын инвестиция, бюджетке түсетін түсімдер мен ең бастысы, жаңа жұмыс орындары. Жоба бойынша кемінде 200 қызылордалық жұмыспен қамтылатын болады», – деді облыс әкімі.
Қорытындылай келе, облыс әкімі әріптестерін бес әлеуметтік бастаманы іске асыру үшін белсенді жұмыс істеуге шақырды.
Есет ТАБЫНБАЕВ.
13 наурыз 2018 ж. 1 068 0

Жаңалықтар мұрағаты

«    Наурыз 2024    »
ДсСсСрБсЖмСбЖс
 123
45678910
11121314151617
18192021222324
25262728293031