Мемлекет мерейін өсіреді

Мемлекет басшысының "Абай және XXI ғасырдағы Қазақстан" атты мақаласын оқыдым. Президент Қасым-Жомарт Тоқаевтың ел дамуын қазақтың біртуар ақыны, хакім Абай Құнанбаевпен ұштастырып отырғаны көңіл қуантады. Биыл ұлы ойшылдың 175 жылдығын тойлау ірі көлемде, жоғарғы деңгейде өту үшін тиісті дайындық жұмыстары басталып кеткенін білдік. Әрине бұндай шара ең біріншіден Абай бабамызды ұлықтау, одан соң халықты рухани тұрғыда дамытып, ғалым хатын өлтірмеу мақсатында қолға алынып жатқаны белгілі.

Бұған дейін де Президент Абай өлеңдерінен үзінді оқу эстафетасын қабыл алып, балалар мен ересектердің өлең-жыр жаттауына, оның құндылығын арттыруға түрткі болған еді. Шынында да бұл үрдіс елдің түкпір-түкпіріндегі әдебиет пен мәдениеттің жанашыры болып жүрген жандардың көңілінен шыққан еді. Мемлекет басшысы Абай Құнанбаевтың мерейтойы қарсаңында осындай ізгі шаралар жаңаша бастау алатынына сенім білдірді. Мен де, ұстаздар қауымымен бірлесіп балаларды бұндай бастамаға белсенді араластыруға ұйытқы боламын.

Президенттің "Халық үніне құлақ асатын мемлекет" атты тұжырымдамасы әділетті қоғам қалыптастыру мақсатында қолға алынған іс екені белгілі. Сонымен қатар қарапайым халық та өзіне қызмет атқарушы мемлекетті құрметтей білгені дұрыс. Әсіресе өскелең ұрпақтың жүрегіне патриоттық сезім ұялатуды дамыта түсу өте құптарлық бастама деп білемін. Сондай-ақ қазақ тілі мәртебесін көтеру мәселесі кезек күттірмей тұрған еді. Оны да, мұғалім мәртебесін арттыруға арналған заң жобасын да Президенттің назарға алуы бізді қуантады. Бұдан да басқа мақалада көтерілген ой-тұжырымдар өте орынды айтылған. Мұның бәрінің алдағы уақытта жас ұрпақ тәрбиесіне көп көмегі тиеді деп ойлаймын.

Қуандық ҚОЖАЛЕПЕСОВ,

Б.Әбдіразақов атындағы

№88 мектептің директоры,

аудандық мәслихат депутаты