Қазалы Қазалы аудандық қоғамдық-саяси газет
» » "Тука" ұры екен

"Тука" ұры екен

Белгілі сатирик Мұхтар Шерім өзінің әлеуметтік желідегі парақшасында «Алдараспан» театрының директоры Нұржан Төлендиевке өкпесі қара қазандай екенін айтып, жазба жариялады. Сатириктің айтуынша, алдағы уақытта әртіс әлеуметтік желіде кешірім сұрамаса, сотқа шағымдануы мүмкін екенін айтып, ескерту жасады деп хабарлайды Qamshy.kz ақпарат агенттігі.

Біз Мұхтар Шерімнің жазбасын оқырманға қолайлы болуы үшін, толық беруді жөн деп таптық.

"Алдараспан" әзіл-сықақ театрының жетекшісі, әртісі Нұржан-Тука Төлендиев інімді жұрттың бәрі жақсы көреді. Мен де құрметтеймін. Өнерін. Талантын. Осы уақытқа дейін оның талантына махаббатым маздап тұр еді, "Алдараспанды" көріп отырып, оған деген ыстық ықыласыма біреу су сепкендей, әлдекім мені ыңқ еткізе тепкендей, таңдайымда құрғақшылық болып, қаңсып кепкендей, сілейдім де қалдым.

Неге дейсіздер ғой? "Тука" інімнің ұры екенін көріп, көздерім алақандай, көңілім жорғалап бара жатқан тарақандай болды! Ойпырмай, бұлар да таусылады екен ғой! Таусылған соң ұрлыққа барады екен ғой? Ол менің үйіме ұрлыққа түскен жоқ, ол менің шығармамды, сатирамды ұрлап кетті! Тал түсте!

Әлеуметтік желілерде жарияланып кеткен "Сирияға кеттім!" атты сатирамды ұрлап, монолог жанрында айтып шықты! Кейіпкерімнің әйелі "Сиырға кеттім!" деп күйеуіне хат жазып кеткісі келеді, бірақ сауатсыздығынан "Сирияға кеттім!" деп жазып қойған. Оқиға осылай өрбиді. Нұржан інімнің сатирамды орындағанына мәз болар едім-ау! Бірақ ұяттан жұрдай, әшейінде сахнада ұлағатты сөздер айтуға келгенде алдына жан салмайтын інім "Сирияға кеттім" сатирамды орындағанда, эфирде "авторы Нұржан Төлендиев" деп берді. Бұл не сонда? Тонау ғой? Дереу өзіне қоңырау шалдым.

"Ойбай, сіздікі ме еді? Маған вацаппен келіп еді... Кешіріңіз... Телевидениеге айтып, фамилияңызды қойдыртамын" деп ақталып жатты ұялмастан. (Бұл дауысын жазып алдым.)

Сонда қалай, вацаппен авторсыз келген әзілдерді Төлендиев мырза өзі жазғандай иеленіп кете бере ме? Авторлық құқығымды талап етіп, сотқа шағымдануым, моральдық шығын талап етуім мүмкін. Өзіме шақ теріме сыймай, әрі жақсы көретін інімді ұры деуге қимай отырмын... Осы бағдарламасында менің тағы бір сатирамды иемденіп кетіпті. Суцид туралы жазғанмын. Идеямды, оқиғаны ұрлаған. Оны да дәлелдей аламын.

Кезінде "Шаншарға" "Үбән" атты әзілімді өзім беріп, осы Нұржан тамаша орындап шыққан еді. "Алдараспанға" "Евромоламды" беріп, ерекше орындап, тағы бір қуантып еді. Енді міне, еңсем есікке қысылып, ұнжырғам ұн болып отыр! Шынында, "Алдараспан" кейінгі кезде аласарып, алақ-жұлақ ете бастады, сөйтсем, таусыла бастапты ғой! Егер маған әлеуметтік желіде кешірім сұрамаса, авторлығыма нұқсан келтірмесе, жағдайы ушығып тұр "Туканың"...
qamshy.kz
02 мамыр 2019 ж. 203 0

Бүгінгi жаңалықтар

Жаңалықтар мұрағаты

«    Мамыр 2019    »
ДсСсСрБсЖмСбЖс
 12345
6789101112
13141516171819
20212223242526
2728293031