Сыбайлас жемқорлыққа қарсы іс-қимыл ұлттық бюросының Қызылорда облыстық департаменті облыстық қорғаныс істері департаментінің бастығына қатысты сотқа дейінгі тергеуді бастады. Полковникке қатысты 600 мың теңгеден астам сомада бірнеше рет пара алды деген күдік келтірілуде. Ол 2017 жылдың қарашасынан желтоқсан айына дейін жүйелі түрде қарамағындағы қызметкерлерден әскери атақ беріп, тәртіптік жауапкершіліктен босатқаны және қызмет барысында қолдау танытып отыруы үшін 20 мыңнан 150 мың теңгеге дейін ақша алып отырғаны анықталды. 4 қаңтарда департамент бастығы ұсталып, Қызылорда қалалық ІІБ уақытша ұстау изоляторына қамалды», - делінген ҚР Мемлекеттік қызмет істері және сыбайлас жемқорлыққа қарсы күрес агенттігі таратқан хабарламада.Сотқа дейінгі тергеу амалдары жүргізілуде.

Еске сала кетсек, сондай-ақ Мұхтар Әуезов атындағы Қазақ мемлекеттік академиялық драма театрының директоры Ерлан Біләл 1,5 млн теңге пара алып жатқан жерінде ұсталды.