Сахналық қойылым байқауына ауыл мектебінің 7, 10 сынып оқушылары бақ сынады. Сахна шымылдығы Ү.Түктібаев атындағы №24 орта мектептің педагог-ұйымдастырушысы Бүркіт Әзидің сөзімен түрілді. Ол қатысушы оқушыларға сәттілік тілеп, батыр баба есімін ұлықтады. Мұнан соң жиналған көрермендерге Жаңқожа Нұрмұхаммедұлы жайында бейнеролик көрсетілді.

Байқаудың шарты бойынша қатысушы драмалық ұжымдар Жаңқожа батыр жайында берілген уақытқа сай қойылымды сахналады. Аталмыш сайысқа тыңғылықды дайындалған оқушылардың көрінісі көрермендер жүрегінен орын тауып, қошеметіне ие болды.

Драмашылар додасының қорытындысында әділ-қазылар алқасының шешімі бойынша І орынды ерекше, әртістік талантымен таңдандырған Қасым Балымбетов жетекшілік ететін 7 «Б» сыныбы ұжымы жеңіп алды. ІІ орын Еркінкүл Бақтілеудің 10 «Б» сыныбы ұжымы иеленсе, ІІІ орын Жадыра Мәмбетова бастаған 7 «А» сыныбы ұжымына бұйырды.

Сонымен қатар «Көрермен көзайымы» номинациясына Салтанат Шамаран, ал «Үздік ер бала бейнесі» номинациясына Ерасыл Рау лайықты деп танылды. Драма ұжымдары бақ сынаған байқау соңы ауылдық клуб өнерпаздарының әсем әнімен тәмамдалды.