Бозкөл ауылында облыстық қолөнер шеберлерінің байқауы өтті
Бозкөл ауылында аудан әкімдігінің қолдауымен Жәлен Ерімбетұлының 120 жыл, Қазалы ауданының 95 жылдығына орай "Жәдігерлер сыр шертеді" атты облыстық қолөнер шеберлерінің байқауы өтті.
Шара басында байқау үміткерлері мен қонақтары қасиет қонған "Қара дүкен" иесі Жәлен Ерімбетұлының мұражайына барды. Онда шебердің және ұрпақтарының қолынан шыққан бұйымдармен танысты.
Бозкөл ауылдық мәдениет үйінде жалғасқан кеште ауыл театрының ұжымы шебердің өмірінен қойылым қойып, көрермендер ықыласына бөленді. Мұнан соң сахна төрінен орын алған аудан әкімінің кеңесшісі Бақытжан Дүзелбайұлы сөз сөйлеп, облыстық байқау ұйымдастырушыларына аудан әкімінің арнайы құттықтауын жеткізді.
Әрі қарай қазылар алқасы қатысушы қолөнер шеберлерінің көрмесімен танысып, әрбір туындыға баға бере отырып, жеңімпазды анықтады.
Нәтижесінде, бас жүлдені өзінің ерекше талантымен таңғалдырған Жаңақорған ауданынан келген Индира Сұлтанбекова жеңіп алды. Бірінші орынды тасарықтық Айжан Тұрдымұрат пен Жанқожа батыр ауылынан Ләйла Жұмағали өзара бөлісті. Ал екінші орынды қожабақылық Мөлдір Пайзекеева мен Айткүл Шалдаева иеленсе, үшінші орын жанкеттік Динара Құдайберген, Лақалы ауылынан Айару Нағашыбай мен бозкөлдік Толғанай Орынбаеваларға бұйырды. Басқа да қатысушыларға номинациялар мен бағалы сыйлықтар табысталды.
