Балалар жасқаншақ болмасын
Балалық шақты қалай зорлық-зомбылықсыз өткізе аламыз? Әрбір баланың өмірі өз қолымызда, сондықтан бала тәрбиесіне аса мән бергеніміз жөн. Мысалы, балаларға көп тежеу жасап «өйтпе, бүйтпе» дей берсек, жасқаншақ болып өседі. Бала білуге құмар, көргеніне еліктегіш, түсінбесе сұрағыш, көкірегі таза, сыншыл және шыншыл болады. Баланың бойындағы осы қасиетін сақтау үшін оған тура шыншыл, адамгершілік тәрбие керек.Қазіргі уақытта балалардың телевизор, компьютерлерден көретіні ұрып-соғу, жан-жануарларды жәбір¬леуді көреді. Осыны көрген бала іштей ненің дұрыстығын, ненің бұрыстығын түсіне бермейді. Әдетте теріс қылықтан кейін жаза қолданады. Бірақ балаға не үшін жазаланғанын дұрыстап ойландырған жөн және бала өзін ата-ананың орнына қойып, өз қылығын олардың көзімен көруге тырыстыру керек. Бала тәрбиелеудің жөні осы екен деп, тәрбиеден тыс қаталдық көрсетудің өзі оның өміріне қауіп туғызады. Қаталдық керек десек те... тәрбиелеудің дұрыс жолдарын қолданған абзал. Тәрбиеге әсер ететін өскен орта, ата-ананың тәрбиесі дұрыс болмаса, балаға кері әсер етеді. Отбасындағы ата-ананың мінез-құлқы балаға үлгі-өнеге алатын басты нысанасы болмақ. Сондықтан, айта кетерім, бала тәрбиесінде қателеспейік, жас шыбықтың түзу өсуіне аса мән берейік.
Г.ШАЗИНДАЕВА,
№97 орта мектептің педагог-психологы.
