Жапондар диетасыз арықтататын су ойлап тапты
Фото: pixabay.comЖапондық Suntory компаниясы адамның іш майын азайтуға көмектесетін ерекше су түрін таныстырды. Бұл туралы Oddity Central басылымы жазды, деп хабарлайды El.kz интернет порталы.
Special Water деп аталатын жаңа өнім сырттай кәдімгі минералды суға ұқсайды: дәмсіз, иіссіз, калория, қант және кофеинсіз. Алайда ол Жапонияда ресми түрде «функционалды тағам» ретінде тіркелген. Бұл мәртебе өндірушіге ғылыми зерттеулермен дәлелденген денсаулыққа пайдалы қасиеттері бар екенін ресми түрде көрсетуге мүмкіндік береді.
Негізгі ерекшелігі — HMPA затының болуы. Бұл ферменттелген күріш кебегінен алынған төмен молекулалы метаболит. Клиникалық сынақтар нәтижесінде HMPA тұрақты түрде қолдану адамның іш аймағындағы майды тиімді азайтып, әсіресе денсаулыққа қауіпті висцералды майдың деңгейін төмендететіні анықталған.
Suntory компаниясының өкілдері Special Water-ды ең алдымен кеңсе қызметкерлері мен аз қимылдайтын өмір салтын ұстанатын адамдарға арналғанын атап өтті. Өнімнің мақсаты – рацион мен күн тәртібін түбегейлі өзгертпей-ақ денсаулықты сақтауға көмектесу.
Компания мәліметінше, бұл суды үнемі ішу іш майын азайтып, жалпы дене пішінін жақсартуға ықпал етуі мүмкін.
Осылайша, жапон инженерлері мен диетологтары «салмақ тастау үшін тер төгудің қажеті жоқ» дәуірге тағы бір қадам жасады.
