Шекара қызметі Ресейге жол жүретіндерге үндеу жасады
Фото: depositphotos.comҚазақстан мен Ресей шекарасындағы үш өткізу бекетінде жөндеу жұмыстары жүріп жатыр, салдарынан шекарадан өту кезіндегі күту уақыты ұзаруы мүмкін, - деп хабарлайды Tengrinews.kz ҰҚК Шекара қызметіне сілтеме жасап.
Әңгіме "Сырым", "Әлімбет" және "Қосақ" өткізу бекеттері туралы болып отыр.
"Сырым" өткізу бекеті Қазақстан мен Ресей шекарасында Батыс Қазақстан облысында, "М-32 Самара - Шымкент" халықаралық трассасында орналасқан. Ресей жағындағы сәйкес өткізбек бекет - "Маштаково".
"Әлімбет" өткізу бекеті Ресеймен шекарада Ақтөбе облысында орналасқан. Ресей жағында оған қарама-қарсы "Орск" өткізу бекеті бар.
"Қосақ" өткізу бекеті Павлодар облысының Успен ауданы аумағында, сондай-ақ, Ресеймен шекарада орналасқан. Бұл - автокөлік өткізу бекеті.
"Осы жайларды ескере отырып, жүріс бағытыңызды алдын ала түзетуді сұраймыз", - делінген ҰҚК Шекара қызметінің хабарламасында.
Қалған өткізу бекеттері қалыпты режимде жұмыс істеп тұр. Мемлекеттік шекарада қандай да бір шектеу шаралары енгізілген жоқ.
