Бүгін аудандық партия филиалының Партиялық бақылау комиссиясының мүшелері аудан орталығы Әйтеке би кентінде салынып жатқан 250 орындық мектептің құрылысына бақылау жұмыстарын жүргізді.
Бүгінгі күнге нысанға ішкі әрлеу жұмыстары, еденіне тақтай орнату, есік-терезелерін орнату, санузел қабырғалары мен едендеріне кафель орнату жұмыстары жүргізілген. Кейбір бөліктерде бұл жұмыстар әлі де жүргізіліп жатыр. Сондай-ақ, бірқатар блоктарда шатырын жабу, терезелерді орнату және сыртқы абаттандыру жұмыстары жүргізілуде.

Нысанның негізгі тапсыру уақыты 2022 жылдың қараша айының соңына жоспарланған. Осы ретте нысанның белгіленген уақытта пайдалануға берілмеуін анықтау мақсатында тапсырыс беруші облыстық құрылыс, сәулет және қала құрылысы басқармасына комиссия мүшелері тарапынан хат жолдау ұсынылды.

Айта кетейік, жоғарыда аталған нысанда және «Қарлаң» учаскесінде жүргізіліп жатқан көпір құрылысында бүгінде партиялық бақылау бекеттері жұмыс жасауда. Көпір құрылысы бойынша қазіргі таңда 53 дана свайға бұрғылап бетондау, 3-ростверг, 1-ледорез, 1-тіреу жұмыстары атқарылды. Сонымен қатар, көпірге жанасатын кірме жолдарына топырақпен көтеру жұмыстары жүргізілуде. Құрылыс жұмыстарының аяқтау мерзімі 2024 жылға жоспарланған.

Мониторинг жұмыстарына аудандық мәслихат депутаты, партиялық бақылау комиссиясының төрағасы Ғазиз Әліш, аудандық партия филиалының Атқарушы хатшысы, комиссия мүшесі Нұрғиса Жалғасбаев, комиссия мүшелері Күншығар Әбілов пен Ділдабек Айтмамбет және аудандық құрылыс бөлімінің маманы қатысты.

#AMANAT