Биыл аудан орталығында бұрын инфрақұрылымы жүргізілген 210 гектар жер учаскесінен есепке алынбаған тұрғын үйлерді газбен және электрмен жабдықтау жұмыстары жүргізіледі. Бұл үшін облыстық бюджеттен қаржы бөлінген. Қазіргі таңда мемлекеттік сатып алу жұмыстары жүргізілуде. Жеңімпаз мекеме анықталған соң құрылыс жұмыстары басталады. Сондай-ақ облыстық бюджеттен бөлінген қаржыға аудан орталығындағы көшелер жөнделуде.

Қазіргі таңда Әйтеке би кентіндегі 7 көшеге қиыршық тас төселуде. Олардың қатарында ұзындығы 1 шақырымға жуықтайтын Қ.Қартақов көшесі бар. Одан бөлек, Қ.Ибрагимов, И.Байзақов, Бейбітшілік, Ә.Қашаубаев, Жанқожа батыр 3 км көшелері мен Біржан сал көшесінің бас жағына қиыршық тас төселуде.

Биылғы жылдың жағымды жаңалығының бірі – Қазалы ауданының орталығы – Әйтеке би кентінде салынып жатқан автоматтандырылған электрондық емтихан алаңы. Ол үшін облыстық бюджеттен тиісті қаржысы бөлінген. Мердігер мекеме «Болашақ» ЖШС құрылыс жұмыстарын қарқынды жүргізуде. Жақын күндері құрылыс жұмыстары толық аяқталып, автоматтандырылған электрондық емтихан алаңы пайдалануға беріледі.

Айта кететін жайт, бұған дейін аудан тұрғындары жүргізуші куәлігін алу үшін облыс орталығына барып, біршама қиындықтарға тап болатын. Енді ол олқылықтың шешімі табылатын күн алыс емес. Мұнда қазалылықтармен қатар, көршілес Арал мен Қармақшы аудандарының тұрғындары да жүргізуші куәлігіне қол жеткізе алады.

Бір мезетте бірнеше ғимарат бой көтерген Қазалыда жаңа білім ордасы салынуда. Әйтеке би кентінің «Достық» деп аталатын мөлтек ауданында орналасқан мектеп 250 оқушыға арналған. Бір гектар аумақты алып жатқан оқу ордасының қазіргі таңда шатыры жабылып, ішкі әрлеу жұмыстары басталып кеткен. Жылдың соңына дейін ел игілігіне беру жоспарлануда.

Кезек ұсыныс-пікірлерге берілгенде кездесуге келгендер мұң-мұқтаждарын аудан басшысының назарына ұсынды. Тұрғындар тарапынан аудандық электр торабына баратын тікелей жол салынса, баға тұрақтылығы бақылауға алынса деген талап-тілектер түсті. Сондай-ақ қоғамдық көліктің уақытылы жүрмейтіндігі және сыйымдылығы аз екендігін мәселе ретінде көтерілді. Барлығын мұқият тыңдаған аудан әкімі Мұхтар Әуесұлы тұрғындардың талап-тілегі ескерусіз қалмайтындығын, қажетті шаралар бірлесіп атқарылатындығын жеткізді. Айтылған ұсыныстарға байланысты жауапты сала жетекшілеріне бірқатар тапсырмалар жүктеді.

Басқосуда аудандық ардагерлер кеңесінің төрағасы Оразғали Бекбанов пен аудандық қоғамдық кеңестің төрағасы Талайлы Бөріқұлақов ауданда атқарылып жатқан жұмыстар ауқымды екенін тілге тиек етіп, елді ауызбіршілікке шақырды.