Дәрігерлерге санаттары үшін қосымша ақы қайтарылады
Медицина қызметкерлеріне бұрын тағайындалған санаттар бойынша қосымша төлемдер қайтарылады, деп хабарлады Денсаулық сақтау министрлігі.Министр Ажар Ғиният салалық кәсіподақ ұйымының және Ұлттық денсаулық сақтау палатасының басшыларымен бірлесіп, 2022 жылғы 1 қаңтардан бастап 2022 жылғы 31 желтоқсанға дейін дәрігерлерге бұрын берілген біліктілік санаттары бойынша еңбекақы төлеу туралы келісімге қол қойды (ең жоғары, бірінші, екінші). Біліктілік санаттарын беру туралы бұрын берілген куәліктердің қолданылу мерзімі маңызды емес.
«Денсаулық сақтау субъектілері қызметкерлерінің (медициналық және фармацевтика қызметкерлерін қоспағанда) еңбекақысын олардың белгіленген лауазымдық жалақыларына түзету коэффициенттерін қолдана отырып төлеуді: 2022 жылғы 1 қаңтардан бастап 1,23 мөлшерінде қамтамасыз етілсін» делінген құжатта. 2020 жылы жаңартылған Денсаулық сақтау кодексі күшіне енді, онда Қазақстандағы дәрігерлердің біліктілік санаттарын беруді реттейтін норма алынып тасталды.
