Менің кітапханам – менің таңдауым
«Мен кітапханаларды ақыл білім, адамгершілік, парасат, иман ордасы деп білемін, ал кітапханашыларды сол ешқашан жоғалмауға тиісті ең асыл құндылықтың жанкешті сақшылары ретінде санаймын», – деді Әбіш Кекілбаев. 2011 жылдан бастап Қ.Күлетов атындағы №92 орта мектебінде кітапханашы болып жұмыс істеудемін. Осы уақыт аралығында мектеп оқушыларының кітап оқуға деген қызығушылығын ояту, дамыту жұмыстарымен айналысып келемін. Мектепішілік іс-шараларға белсене араласып, өз білгенімді қызметтестеріммен бөлісіп, олардан да үйренгенім аз емес. Мектеп ішінде «Кітап апталықтарын» өткізіп, оқушылармен бірге ертегілер әлеміне саяхат жасап, кітапқа қызығушылығын ояту жұмыстарын жүргізудемін.Кітапхана ғасырлар бойы келе жатқан шырағы биік парасаттылық пен білімділіктің киелі ордасы. Кітапханашының ары таза, адал, инабатты, сыпайы, парасатты байсалды, ұстамды, төзімді, кешірімді болуы тиіс. «Сөйлеу мәдениеті» кітапханашының басты құралы. Оқырмандарды кітаппен кездестіре отырып, бүкіл адамгершілікке қатысты қасиеттерді тануға үйретеді.
Кітапхана жұмысында жаңа технологияларды қолдану қызмет сапасын арттырып, оқырман санын толықтырып, мәдени деңгейінің көтерілуіне тиімді әсер етеді. Кітап – рухани азық. Ал кітапхана – рухани байлықтың ордасы болса, кітапханашы – қандай жұмыс түрлері болмасын өздерінің кәсіби шеберліктерімен заман талабына сай әдебиетті насихаттап, ұрпаққа жан-жақты тәрбие беруде түрлі ақпараттар ағымына жол сілтеуші қоғамның белсенді мүшесі. Кітапханашы – әрдайым білім, ғылым, өнердің дамуына өз үлестерін қосатын мамандық иесі. Әр кітап пен оқулықтың жақсы күйде сақталуында кітапханашылардың еңбегі қашанда өлшеусіз. Жылжып уақыт өткен сайын жылдан-жылға оқырман сұранысы артуда. Оқырманға уақыт талабына сай қызмет көрсету де кітапханашылардың міндеті боплып қала бермек.
Аймира БЕКБАЕВА,
№92 орта мектеп кітапханашысы
