«Кәсіби біліктілік туралы» заң әзірленеді
ҚР Премьер-Министрінің орынбасары Ералы Тоғжановтың айтуынша, біліктілікті реттеу еңбек нарығындағы барлық өзара қарым-қатынасты өзгертетін түбегейлі және жүйелі қадам болмақ. Бұл туралы ол ҚР Үкіметінің баспасөз орталығында Мемлекет басшысының Қазақстан халқына Жолдауын іске асыру шаралары жөніндегі брифингте айтты, деп жазады inbusiness.kz.«Жұмыс орындарына, қызметкерлердің біліктілік деңгейіне қойылатын талаптарды белгілеу арқасында көптеген елдерде технологиялық серпіліс жасалды. Оңтүстік Кореяның тәжірибесі 1973 жылы «Ұлттық техникалық біліктілік жүйесі туралы» Заңның қабылдануы нәтижесінде ЖІӨ-нің 100 еседен астам өсуіне қол жеткізілгенін көрсетеді. Осыған ұқсас, Қазақстанда «Кәсіби біліктілік туралы» заң әзірленетін болады», – деді ол. Ералы Тоғжанов еңбек нарығына арналған 589 кәсіптік стандарт әзірленіп, қолданылып жатқанын айтып өтті.
