Той – қазақтың қазынасы деген халықпыз. Бұған байланысты том-том салт-дәстүр, жөн-жоралғы бар. Алайда адамзаттың тағдырына қауіп төнген қазіргі сәтте билік бұған тыйым салып отыр. Өйткені көпшілік басқосуларда вирустың таралу қаупі еселене түседі. Ішкі түйсігіңіз бұған сенсін, мейлі сенбесін, той жасауға рұқсат жоқ. Әрі-беріден соң тұтас қоғамның амандығы үшін жасалып жатқан іске тым болмағанда кедергі келтірмеу баршамыздың парызымыз. Дей тұрғанмен жаңа тыйымға теріс қарап, тығылып той жасайтындар саны күн сайын көбеймесе, кеміп отырған жоқ. Осыған байланысты аудан әкімдігі жанынан үш бірдей мониторингтік топ құрылған. Олар аудандық полиция бөлімінің қызметкерлерімен бірлесіп, сақтыққа селсоқ қарағандарды анықтап келеді.

– Жаңа қаулыдағы шектеулерді түсіндіру, ақпараттық насихат жұмыстары үздіксіз жүргізіліп келеді. Әсіресе қоғамдық тамақтану орындары мен тойханалар басты назарда. Бұл тұста заңбұзушылыққа бейжай қарамайтын аудан тұрғындары да ортақ іске атсалысып, бізге хабар беріп отырғанын айта кету керек. Десек те жасырынып үйлену тойын жасап, ас беріп жүргендер аз емес. Мейрамханалар есігін іштен құлыптап, отбасылық шаралар ұйымдастырған жағдайлар да кездесті. Оларға полиция бөлімі арқылы тиісінше ескерту, айыппұлдар салынды. Әлі де болса жергілікті кәсіпкерлер мен тұрғындарды қысылтаяң сәтте түсіністік танытып, той-жиынды кейінге қалдыруға шақырамыз, – деді рейдтік топ мүшесі Ақтілеу Бөріқұлақов.

Еске сала кетейік, бұдан былай «Ashyq» қосымшасына тіркеліп, QR код алған кәсіп нысандарының шаруасына шектеу қойылмайды. Ал «Ашықтан» қашық тамақтану орындары кешкі сағат сегізде есікке құлып салуына тура келеді.