Аудан әкімі Мұрат Ергешбаев салық төлеушілермен жұмысты үйлестіріп, салықтық бақылауды ұйымдастыру жолында табысты жұмыс істеп келе жатқан мемлекеттік кірістер басқармасы ұжымының еңбегін ерекше бағалап, сала қызметкерлерін мерекелерімен құттықтады.

– 2019 жыл ауданымыз үшін табысты болды. Олай дейтініміз, өткен жылы жергілікті бюджеттің жоспары жыл басында бекітілген көлемнен жыл аяғында 213 млн теңге артық орындауға қол жеткізілді. Ағымдағы жылдың 6 айында жоспар 118,5 млн теңгеге ұлғайтылып отыр. Бұл өз кезегінде, фискалды органдар мен жергілікті арқарушы органдардың бірлескен түрде атқарылған жүйелі жұмысының жемісі, ел мүддесі үшін жұмыла жұмыс жасауының арқасы деп білемін. Жыл аяғына дейін бұдан да жоғары көрсеткішке қол жеткізіледі деген сенім бар, – деген аудан басшысы Мұрат Нәлхожаұлы бірқатар қызметкерлерді «Алғыс хатпен» марапаттады. Сондай-ақ, сала ардагерлеріне де құрмет көрсетіп, бағалы сыйлықтарды табыстады.

Салтанатты жиында аудандық мәслихат хатшысы Күнтілес Назымбеков те құттықтау сөз сөйлеп, мерекелік лебізін жеткізді.

Ал, Қазалы ауданы бойынша мемлекеттік кірістер басқармасының басшысы Темірлан Қожаназаров салық базасын ұлғайтуда ұйымшылдықпен жұмыс атқара білген ұжымдастарының еңбегін атап өтіп, аудан басшыларына алғысын айтты.