Екі жылдан бері мемлекет жұмыс іздеу және жұмыссыздарды еңбекке орналастыру бойынша аутсорсингтік қызмет көрсететін жеке HR-агенттіктерді тартуда. Тұрақты жұмысқа орналасқан әрбір адам үшін 35 мың теңгеден 52,5 мың теңгеге дейін төленеді. Бірақ көптеген адамдар тіпті, жеке тұлғалар осылай табыс табуға болатынын білмейді.

Еңбек ресурстарын дамыту орталығының мәліметінше, «Халықты жұмыспен қамту туралы» заңға сәйкес, аутсорсингтік қызмет көрсетуге қатысатын үміткерлерге бірдей талаптар қойылады. Заңды және жеке тұлғалардың тиісті жұмыс тәжірибесі, сондай-ақ қажетті материалдық және еңбек ресурстары болуы тиіс. Ал, жеке тұлғалардың тек бір ғана жалдамалы қызметкері және Жеке кәсіпкерлік туралы тіркеуі болса жеткілікті.

Аутсорсинг қатысушылары мемлекеттен бірқатар тиімді ұсыныстар мен артықшылықтарды ала алады:

– мемлекеттік жұмыспен қамту орталығының мамандары жан-жақты қолдау көрсетеді;

– халықты жұмыспен қамту орталығы жұмыссыздар туралы толық ақпарат береді;

– электронды форматта халықты жұмыспен қамту орталығымен аутсорсинг туралы шартты «Электрондық еңбек биржасында» (www.enbek.kz) жасай алады;

– аутсорсингтік қызмет көрсету аясында жұмыссыздарды жұмысқа орналастыру үшін кепілді төлем алады;

– «Электрондық еңбек биржасы» порталындағы бос жұмыс орындарын шексіз пайдалана алады.

«Еңбек ресурстарын дамыту орталығы» АҚ Жұмыспен қамту қызметін дамыту департаментінің директоры Ирина Рубашина: «Халықты жұмыспен қамту саласында аутсорсингтік қызмет көрсету – жаңа бизнесті бастағысы келетіндерге тамаша мүмкіндік. Өйткені қатысу үшін аз қаржы жұмсалады. Шарт бойынша аутсорсингтік қызмет көрсететін агенттік немесе жеке кәсіпкер (ЖК) 30 жұмыс күн ішінде бос жұмыс орнын іздеп табуы керек. Аутсорсинг арқылы жұмысқа орналасқан азаматтар алты айдан кем емес үздіксіз жұмыс істеуі тиіс», – деді.

Оның айтуынша, азаматтарды жұмысқа орналастырғаны үшін мемлекет ақы төлеуге кепілдік береді. Тариф көлемі 35 000 теңгеден 52 500 теңге аралығында. Қаржы көлемі жұмыссыздың жұмысқа орналасу қиындығына және оның қала немесе ауылдық жұмыспен қамту орталығында тіркелген орнына байланысты болады.

«Аутсорсингтік қызмет көрсететін компаниялар не жеке тұлғалардың тіркелу орнына ешқандай талаптар қойылмайды. Яғни жеке агенттіктер бірнеше өңірде және аутсорсинг туралы бірнеше келісімшарт бойынша қызмет көрсете алады», – деді И. Рубашина.

Аутсорсинг мәселелері бойынша жақын жерде орналасқан халықты жұмыспен қамту орталығына немесе «Еңбек ресурстарын дамыту орталығы» АҚ-қа хабарласуға болады.