Тынымсыз еңбектің арқасында Қазалы ауданындағы ауыл шаруашылығы саласы жыл сайын алға жылжып келеді. Жақсы жетістіктерге жетіп, жоғары көрсеткіштерді бажайлап тұр. Өткен жылы ауданда ауыл шаруашылығының жалпы өнім көлемі 24 миллиард 971,1 теңгені құрапты. Сонымен бірге былтыр 17 377 гектар жерге ауыл шаруашылығы дақылдары егілген.

– Былтырғы жылы егілген өнімнің басым бөлігі – күріш. Оның көлемі 6 450 гектарды құрайды. Сырдария өзенінде қалыптасқан су тапшылығына байланысты биік жерлерге орналасқан күріш егісінің көлемін 543 гектарға қысқартып, әртараптандыру бағытындағы дақылдардың көлемін ұлғайтуға ерекше мән бердік. Су тапшылығының алдын алу үшін өткен жылы Басықара, Құмжиек, Майлыбас ауылдарына 3 дана көтерме насос сатып алынып, коллекторлар жөндеуден өткізді. Есепті кезеңде ауданнан 6 шет мемлекетке, яғни Ресей, Белорусь, Дания, Германия, Нидерланды және Қытай елдеріне 1030 тонна күріш, 1030 тонна балық өнімі және 1267 тонна қамыс экспортталды. Ал мал шаруашылығына келер болсақ, төрт түліктің барлық түрінде айтарлықтай өсім бар. Қазір аудандағы мал басының басым бөлігі ауыл шаруашылық кәсіпорындарының иелігінде. Шаруашылықты дамыту мақсатында қаржы ұйымдары тарапынан жергілікті шаруа қожалықтардың жалпы құны 246,3 миллион теңгені құрайтын 29 жоба қаржыландырылды, – дейді аудан әкімі Мұхтар Әуесұлы.

Экспорттың көлемін арттыру арқылы әлемдік нарықта бәсекелестікке төтеп бере алатын тауар шығаруға қабілеттілік артады. Ол дегеніміз, отандық өндірістің көкжиегі кеңейеді деген сөз. Тек талапқа сай өнім өндіріп, дұрысынан ұсына білсе болды. Ал қоғамдық-саяси ахуалдың тұрақты болуы – халықтың екі қолға бір күрек ұстауына байланысты емес пе? Кәсіпкерліктің дамуына күш салған аймақ бұл мәселелерді шешуге әлдеқашан кірісіп кеткен. Бұл орайда мемлекет отандық өндірушілерге қолдау көрсетіп, бизнес үшін қолайлы жағдай да жасады. Ал жаһандық нарыққа шығатын, бәсекеге қабілетті өнім шығару – барша шаруалар мен диқандар еңбегін шыңдай түсуде.