Жарияланған бұйрық жобасына сәйкес, бағаларына мемлекеттік реттеу белгіленген бөлшек саудада өткізілетін мұнай өнімдеріне қосымша құн салығы есебімен шекті бағалар мынадай мөлшерде белгіленген.

Мәселен, Аи-80 маркалы бензин — 1 литр үшін 89 теңге; Аи-92, Аи — 93 маркалы бензин Қостанай, Солтүстік Қазақстан облыстарында — 1 литрі 187 теңге болмақ.

Ал Нұр-Сұлтан, Алматы, Шымкент қалаларында, Ақмола, Ақтөбе, Шығыс Қазақстан, Батыс Қазақстан, Алматы, Атырау, Жамбыл, Қарағанды, Қызылорда, Павлодар, Түркістан, Маңғыстау облыстарында, сондай-ақ Абай, Жетісу, Ұлытау облыстарында — 1 литрі 182 теңге.

Жазғы, маусымаралық дизель отынының бағасы Ақмола, Ақтөбе, Шығыс Қазақстан, Батыс Қазақстан, Қостанай, Солтүстік Қазақстан облыстарында, сондай-ақ Абай облысында — 1 литрі 260 теңге болады.

Нұр-Сұлтан, Алматы, Шымкент қалаларында, Алматы, Атырау, Жамбыл, Қарағанды, Қызылорда, Павлодар, Түркістан, Маңғыстау облыстарында, сондай-ақ Жетісу, Ұлытау облыстарында — 1 литрі 230 теңгеден сатылады.

Сондай-ақ Энергетика министрлігі мұнай өнімдерін бөлшек саудада өткізуге шекті баға мұнай мен мұнай өнімдерінің әлемдік бағаларын, Еуропа нарықтарына дейінгі көлік шығыстарын, акциздерді, операциялық және басқа да шығыстарды ескеріп, Аи-92 маркалы бензин литрі– 236 теңге, дизель отыны — 420 теңге екенін ескертті.

Аи-92 маркалы бензин бағасының 54 теңгеге күрт өсуі халық арасында теріс әсер етуі мүмкін. Сондықтан 2025 жылға дейін шекті бөлшек сауда бағаларын кезең-кезеңімен көтеру ұсынылады,— делінген бұйрық жобасында.