Лаостың Аттопе провинциясында Гидро электр стансысы бөгетінің бұзылуы салдарынан бірнеше адам қаза тауып, жүздегені із-түзсіз жоғалды. Бұл туралы сейсенбі күні жергілікті БАҚ-тарға сілтеме жасап Синьхуа агенттігі хабарлады.

  Төтенше жағдай Лаос астанасы Вьентьяна қаласынан 570 шақырым жердегі Аттопе провинциясында болды. Дүйсенбі күні сағат 20.00-де гидроэнергетикалық дамба бұзылып, 5 млрд текше метр су бүтін бір ауданды шайып кетті. Салдарынан бірнеше адам ажал құшты. Жүздеген адам із-түзсіз жоғалды.

 Лаос премьер-министрінің кеңсесі сейсенбі күні жариялаған құжатта мәлім етілгендей, зардап шеккен ауданда төтенше жағдай жарияланып, барлық қоғамға гуманитарлық көмек көрсету операцияларына белсенді қатысуға үндеу тасталды.

  ГЭС-ті Корея, Лаос және Таиланд Республикаларының кәсіпорындарынан құралған консорциум салып жатыр. Құрылыстың қаржысы негізінен оңтүстіккореялық капитал есебінен қамтамасыз етілген. Оның жалпы қуаты 410 мың киловатт болмақ. Құрылыс жұмыстары 2013 жылы басталған. ГЭС-ты 2018 жылы іске қосу жоспарланған еді

inform.kz