2019 жылдың 1 қаңтарынан бастап әлеуметтік салаға бірқатар өзгеріс енді. Осы орайда біздің қоғамда бірыңғай жиынтық төлем жүйесі пайда болды. Бұл жүйенің негізгі мақсаты қандай? Бізге берер мүмкіндігі бар ма?» деген сауалдар төңірегінде облыс әкімдігі жанынан құрылған мобильдік топ мүшелері ауданымызда болып, түсіндіру жұмыстарын жүргізді.

Әйтеке би кенттік клубындағы кездесу барысында облыстық жұмыс­пен қамтуды үйлестіру және әлеуметтік бағдарламалар басқар­масының бөлім басшысы Жанар Дәулетбаева «Жаңа жүйе­нің негізгі мақсаты – өзін-өзі жұмыс­пен қамтып жүрген азаматтарды, яғни, «көлеңкеде жүрген жұмыс­шыларды» заңдастыру», – деп түсіндірді. Бірыңғай жиынтық төле­мінің көлемі республикалық маңызы бар қалаларда, елорда және облыс орталықтарында 1 айлық есептік көрсеткіш, яғни 2525 теңге көлемінде. Ауылдық жерлерде 1263 теңге. Бірыңғай жиынтық төлемді әркім өз бетінше немесе ол үшін үшінші тұлға төлесе болады.

Бұл төлемді төлеушілер мін­детті медициналық сақтандыру аясында барлық медициналық қыз­мет түрлеріне қол жеткізе алады. Медициналық ұйымды таң­дау өз еркінде. Сонымен қатар зейнетақы жүйесінде еңбек өтілін жинап, базалық және жинақталған компоненттердің есебінен үлкен көлемде зейнетақы алатын болады. Бұл жерде БЖТ төлеушінің базалық зейнетақысы еңбек өтіліне қарай есептеледі. Еңбекке жарамсыз болып қалғанда, асыраушысынан айырылғанда, жүктілік және бала туғанда, бала асырап алғанда немесе 1 жасқа дейінгі бала күтімінде отырғандарға әлеуметтік сақтандыру қорынан сақтандыру төлемдерін алуға мүмкіндігі туады. Тағы бір артықшылығы, жүйелі жарна төлеп отырсаңыз, ресми түрде банктен несие ала аласыз.

Семинар кезінде «Әлеуметтік медициналық сақтандыру қоры» коммерциялық емес акционерлік қоғамы Қызылорда облысы бойынша филиалының бас сарапшысы Абылайхан Рахымов МӘМС заңына енгізілген өзгерістер мен толықтыруларға тоқталды. Оның айтуынша, әлеуметтік медици­налық сақтандыру қорына төле­нетін жарналар мен аударымдар бес түрлі форматпен жүр­гізіледі. Міндетті әлеуметтік медициналық сақтандырудың жаңа үлгісіндегі медициналық пакетіне консуль­тативтік-диагнос­тикалық көмек, ересектерді профи­лактикалық, ал бала­ларды маман­дандырылған дең­гейдегі тек­серу, ақысы қымбат зерт­хана­лық диагностикалық қыз­меттер кіреді.

Сонымен қатар семинарға қатыс­қандар жалақының көбеюі, электрон­дық еңбек шарттары, электронды еңбек биржасы, база­лық зейнетақыны тағайындау әдісте­месінің өзгеруі, әйелдердің зейнетке шығу жасының ұлғай­тылуы туралы ақпараттарға қанықты.

Семинарды аудандық жұмыс­пен қамту, әлеуметтік бағдар­ламалар және азаматтық хал актілерін тіркеу бөлімінің басшысы Совет Бабанев қорытындылады.