Ерімбет рухы жырмен жаңғырды
Биыл дүлдүл сөздің дүрі, шын тұлпардың бірі – Ерімбет Көлдейбекұлының туғанына 175 жыл толып отыр. Осыған орай Бозкөл ауылдық мәдениет үйінде «Қарасақал Ерімбет – жырдың селі» атты аудандық жазба ақындар мүшәйрасы ұйымдастырылды.Шараны ауыл әкімі Ақылбек Бөлебай ашып, қатысушыларға сәттілік тіледі. Ал Ардагерлер кеңесінің төрағасы Жанұзақ Келімбетов сөз алып, мүшәйраның жоғары деңгейде өтуіне тілектестігін білдірді.
Жыр додасына ауданға қарасты ауылдық елді мекендерден 11 талапкер қатысып, өздерінің жүректен шыққан өлеңдерін мәнерлеп оқыды. Нәтижесінде бас жүлдені Қарасақал Ерімбет атындағы №96 орта мектептің 10-сынып оқушысы Кәусар Тасқали жеңіп алды. Бірінші орын лақалылық Балнұр Қасымға бұйырды. Екінші орынды кәукейлік Таңсұлу Жаңғазиева мен қожабақылық Нұрай Нұрмаш еншіледі. Ал қазалылық Дарын Жақсылық, абайлық Ақжан Бекарыстан және басықаралық Гүлзада Әби үздік үштіктің қатарын толықтырды.
Жеңімпаздар мен жүлдегерлерге арнайы дипломдар мен қаржылай сыйлықтар табысталды. Ал байқауға белсенді қатысқан өзге жас ақындар түрлі аталымдармен марапатталды.
Атап айтсақ, арандылық Аяна Наурызбай "Үздік жас ақын", Тасарық ауылынан қатысқан Мансұр Құттыбай "Көрермен көзайымы", өркендеулік "Ақбота Сақа "Ең маңызды туынды", Бірлік ауылынан қатысқан Асылжан Ордабай "Талантты ақын" аталымын иемденді.
Осылайша, шайыр рухына арналған бұл шарада жас буын бабалар аманатына адалдық танытып қана қоймай, жыр арқылы мәңгілік мұраны жаңғыртып, ұлттық рухты жаңаша серпілтті.
Арайлым ЖҮСІПОВА
