Құранның қасиеті ұлықталды

Әйтеке би кентіндегі «Жанқожа батыр» мешіті мен мешіт жанындағы «Әйел-қыздар» секторының ұйымдастыруымен «Құран – мәңгі мұғжиза» тақырыбымен құран оқудан байқау өткізілді. Оған 16 және 53 жас аралығындағы әйелдер мен қыздар қатысты.

Байқауды ауданның бас имамы Берік Сүлейменов ашып, Құран арқылы әйел заты теңдікке жеткендігін, жан мен тән, ар мен жүректі кірден арылтып, адамзатқа бақыт әкелгендігін, Құранды үйрену де, өзгелерге үйрету де жақсылыққа жеткізетіндігіне тоқталды. Талапкерлерге құранның кез келген өзі таңдаған үш сүресін жатқа араб тілінде оқып, қосымша үш сұраққа жауап бере отырып, тәжуид, қырағатқа аса мән берілетіндігін, Құран оқу ережесіне сәйкес түсіндірді.

Байқауға қатысқан тоғыз талапкердің бәрі де осалдық танытпады. Сонда да «Жүйріктен жүйрік озар жарысқанда» дегендей, дара шыққандар анықталды.

Сөйтіп, бірінші орын «Қожаназар ишан» мешітінің шәкірті Әйгерім Жарасқа, екінші, үшінші орындар «Жанқожа батыр» мешітінің шәкірттері Ақбота Өмірбаева мен Құндыз Қазыбектерге бұйырды.

Жеңімпаздарға алғыс хат пен бағалы сыйлықтар тапсырылды.

«Жанқожа батыр»мешітінің баспасөз хатшысы.