Алты алаштың анасына айналған Сыр елінен сүбелі сөзді кие тұтып, көнеден жеткен нақыл-насихатты өскелең ұрпақ бойына сіңіріп, алқалы топта өсиет-өлең толғап, тыңдарманның көңілін дөп басқан шайырлар көп шыққан. Сыр сүлейлерінен жеткен дара дәстүрді жоғалтпай, ізін жалғаған жас жыршылар ел арасында өсіп келеді.

Бұл кеште жоғарыдағы аталған ауылдардан келген жыршы-термешілер Нұртуған Кенжеғұлұлының, Байназар Өтептің, Әубәкір Кердерінің, Шал ақынның лағыл жырларын көмейінен төгілдірді. Өзіне тән мақамы келіскен, нұсқалы сөзден өрілген терме тыңдаған көрермен Болатбек Рсалиев, Жеңіс Қожабергенов, Сырғали Қажығали, Нұргүл Шайық сияқты өнерпаздардың талантына тәнті болды.

Кешті қорытындылаған аудандық мәдениет және тілдерді дамыту бөлімінің басшысы Болат Жолтаев шараның жоғары деңгейде өткендігіне тоқтала келе, алдағы уақытта да мұндай баянды бастаманың жалғасын табатынын айтты.