Құрметті қазалылықтар!
Сіздерді 16 желтоқсан – Қазақстан Республикасының Тәуелсіздік күні мерекесімен шын жүректен құттықтаймын!
Ата-бабаларымыздың ғасырлар бойы көксеген арманына, аяулы мұратына қол жеткізгеніне биыл – 32 жыл толып отыр.
Тәуелсіздік күні – жас ғұмырын ел бостандығы үшін күреске арнаған боздақтардың жанкешті ерлігі мен қайсарлығын еске алатын қастерлі мереке. Сондықтан да бүгінгі күн – ата-бабамыз аңсаған арманы жүзеге асқан, елімізге еркіндік сыйлаған Ұлы тарихи күн.
Тәуелсіздік алған алғашқы жылдары халқымыз көптеген қиындықтарды бастан өткерді. Бірақ, уақыт өте келе ол қиыншылықтар артта қалды. Тарихымыз қайта парақталып, ұлттық рухымыз жаңғырды. Ел тарихынан тағылым алатын ақтаңдақтардың сыры ашылды, тіліміз де діліміз де жаңа белестерге бет түзеді.
Татулық пен тұрақтылық орныққан еліміз ынтымақ ұясына, бірліктің төріне айналды.
Осындай егеменді ел болу мәртебесін көру – бүгінгі ұрпаққа бұйырған зор бақыт деп білемін.
Еліміздің Тәуелсіздігі күнімен тағы да баршаңызды шын жүректен құттықтай отырып, әр отбасына зор денсаулық, шаңырақтарына шаттық, берекелі бірлік тілеймін.
Тәуелсіздігіміз тұғырлы, елдігіміз ғұмырлы болсын!
Ізгі ниетпен,
М.Оразбаев
Қазалы ауданының әкімі
Құрметті қазалылықтар!
