Тарих пен тәсілдің тоғысуы

Жүзжылдық тарихынан бөлек білім ордасының мәртебесі, сонымен қатар түлектерімен де ерекшеленеді. Қазақтың әйгілі әншісі Роза Бағлановадан бастап, философия ғылымдарының кандидаты, профессор Мұстафа Матаев алғашқы «Алтын медаль» иегері болса, Қазақстанның еңбек сіңірген өнер қайраткері Қайырбай Зәкіров сынды тұлғалардың барлығы да осы мектепті тәмәмдаған. Олардың кәсіби жетістіктері мен қоғамдық қызметтері мектептің мәртебесін көтеруде маңызды рөл атқарды.

Сонымен бірге мектеп қабырғасынан шыққан көптеген түлек ғылым кандидаты, профессор және академик дәрежесіне жетті. Бұл білікті ұстаздардың еңбегінің жемісі мен мектептің білім беру сапасының көрсеткіші деп ұғынамыз. Ұстаздар мен оқушылардың қажырлы еңбектері арқасында мектеп саласында айтулы табыстарға жетіп келеді.

Қазіргі кезеңде де абырой тұғырынан түспеген қасиетті орын инновация мен жетістіктер алаңы десек артық айтқандық емес.

Бүгінде Жанқожа батыр атындағы №70 орта мектеп заман талабына сай білім беруді жаңартып, жаңашылдыққа ұмтылуда. 2023-2024 оқу жылының қорытындысы бойынша мектеп аудан көлемінде үздік үш білім ошағының қатарына кірді. Мектеп директоры, «Алтынсарин» төсбелгісінің иегері Төребай Айдарбекұлы аудандық «Үздік директор – 2024» байқауында бірінші орынға ие болып, кәсіби шеберлігін тағы да дәлелдеді.

2024-2025 оқу жылында ұстаздар қауымы да жүлделерге ие болды. Мәселен, тарих пәнінің мұғалімі Бағила Ахметова «Үздік педагог – 2024» байқауының облыстық кезеңінде жүлдегер атанып, «педагог-шебер» санатын иеленді.

Қазақстан Республикасында білім беру саласында жетістіктерге жеткен педагогтар мен білім беру ісіндегі қызметкерлерге берілетін марапаттар жылдан-жылға молайып келеді. 2024-2025 оқу жылында мектеп директорының оқу ісі жөніндегі орынбасары Ділдабек Айтмамбет Қазақстан Республикасының Білім және ғылым министрлігінің «Білім беру ісінің құрметті қызметкері» төсбелгісімен марапатталды. Аталмыш марапат білім беру жүйесінде білім сапасын арттыру мақсатында атқарған қажырлы еңбегінің нәтижесі. Айтмамбет Ділдабек мұғалімдер мен оқушылар арасында оқу үрдісін жақсартуға, инновациялық әдістерді енгізуге және мектептің жалпы білім беру деңгейін көтеруге бағытталған маңызды шараларды жүзеге асырған.

Сонымен қатар қазақстандық ұстаздардың кәсіби біліктілігін арттыруға үлес қосқан 3 педагог – Лаззат Шамшадинова, Нәзігүл Ерман және Айгүл Жұбаназар Қазақстан Республикасы Оқу-ағарту министрлігінің «Құрмет грамотасымен» марапатталды. Бұл мұғалімдердің білім беру процесіндегі шығармашылығы мен белсенділігін, оқушылармен жүргізілген сабақтардағы еңбектерін айқын көрсетеді.

Аудандық «Үздік пән мұғалімі – 2024» байқауының нәтижелері де көңіл қуантады. Байқауда Әліш Ақтоты, Жанарыстан Ерболат, Төлеу Ержан және Нұрман Бауыржан жүлделі орындарға ие болды. Бұл ұстаздар пәндерін терең меңгеру, жаңашыл әдістерді қолдану және шәкірттеріне сапалы білім беру арқылы олардың бәсекеге қабілетті болуын қамтамасыз етуде елеулі үлес қосқан.

Бұдан тыс «Үздік жыл мұғалімі» байқауында 5 мұғалім I орын, 1 мұғалім II орын, 4 мұғалім III орынмен және 3 мұғалім Алғыс хатпен марапатталды. Байқау білім саласындағы үздіктерді анықтауға, олардың тәжірибелерін жариялауға, әрі жастарды ұстаздыққа тарту мақсатында өткізіліп келеді.

Осылайша Қазақстанда білім беру ісіндегі жетістіктер мен марапаттар бұдан былай да жалғаса беретініне сеніміміз мол. Білім әрбір елдің болашағы, сондықтан ұстаздардың еңбегі баға жетпес. Ұстаздардың жетістіктері тұтас халықтың білім деңгейінің көтерілуіне ықпал ететін құнды қадам ретінде бағалану қажет. Бұл мұғалімдердің кәсіптік біліктілігінің жоғары деңгейде екенін көрсетеді.

Оқушылардың спорт және ғылыми жарыстарда көрген нәтижелері де көңіл қуантады. Пәндік олимпиадалар мен ғылыми жобаларда жүлдегерлер саны артқан сайын, мектептің абыройы да асқақтай түсті.

«Дарын» және «Зерде» ғылыми жобалар байқауларында да мектеп оқушылары жоғары нәтижелер көрсетіп, жүлделі орындарға ие болды. Оқушылардың зерттеу мен ғылымға деген қызығушылығы мен ынтасы, ұстаздар тарапынан берілген қолдау мен бағыттау арқасында, білім ошағының ғылыми әлеуеті айтарлықтай жоғары. Мектепте өткізілетін ғылыми конференциялар, дөңгелек үстелдер мен семинарлар оқушылардың өзіндік жобаларын қорғауға, шеберліктерін шыңдауға мүмкіндік береді.

Одан бөлек спорттық жетістіктер де көңіл қуантады. Мектеп оқушылары аудандық спартакиадалар мен ұлттық мектеп лига бәйгелерінде әрқашан белсенді болып, жүлделі орындарға ие болып отырады. Спорттық командалар, әртүрлі спорт түрінен жаттықтырушы-ұстаздарының жетекшілігімен, ел намысын қорғап, жарыстарда жоғары нәтиже көрсетеді. Оқушылар арасындағы командалық рух, ынтымақтастық және табанды еңбек спорттық жеңістерге жетудің негізі болып табылады.

2024-2025 оқу жылы табысты жетістіктермен басталды. Жалпы білім беретін пәндер бойынша аудандық олимпиадада 39 оқушы жүлдегер атанып, 6 оқушы облысқа жолдама алды. Білім сапасының жоғары деңгейін көрсететін зор жетістік. Аудандық олимпиаданың облыстық кезеңінде 11 сынып оқушысы Нұрадин Мирзат (орыс тілі мен әдебиеті) ІІІ орын, 9 сынып оқушысы Нұрболұлы Нұрдаулетияр (құқық негіздері) ІІІ орын, ал 9 сынып оқушысы Айдарбек Еділ (география) Алғыс хат иеленді. Бұл жеңістер – оқушылардың қажырлы еңбегінің, ұстаздардың бағыт-бағдарының және мектептің білім беру жүйесінің нәтижесі.

«Дарын» ғылыми жобалар байқауынан 4 оқушы, «Зерде» ғылыми жобалар конкурсынан 17 оқушы жүлдегер атанып, облысқа жолдама алған 6 оқушы да жүлделі орындарға ие болды. Республикалық кезеңде 11 сынып оқушысы Жақсыберген Ақмарал Алғыс хатпен марапатталды. Бұл жобалар оқушылардың ғылымға, зерттеу жұмыстарына деген қызығушылықтарын арттыруда орасан зор рөл атқарады.

«Табиғатты аяла» облыстық форумында 8 сынып оқушысы Зиналадин Айпатша І орын иеленіп, республикалық кезеңге жолдама алды. Бұл жүлде табиғатты қорғау мен экологиялық мәселелерге бағытталған жобалардың маңыздылығын арттырды. Аталған жеңістер шәкірттердің жаңашылдыққа деген ұмтылысын көрсетеді.

2025-2026 оқу жылында «Зерде» конкурсының облыстық кезеңінде 4 сынып оқушысы Ердаулет Ерасыл ІІІ орын, 7 сынып оқушысы Жаңабай Асылы Алғыс хат иеленді. Сондай-ақ, республикалық ғылыми жобалар конкурсының облыстық кезеңінде 9 сынып оқушысы Зиналадин Айпатша ІІ орын, 10 сынып оқушысы Урмантаев Мади ІІІ орын, 9 сынып оқушысы Мирамбек Сымбат Алғыс хатпен марапатталды. Оқушылардың ғылыми істерде өздерін танытып, білімін көрсетудегі жетістіктерінің бір парасы.

Пәндік олимпиадада 5-6 сыныптардан 9, 7-8 сыныптардан 13, 9-11 сыныптардан 16 оқушы жүлделі орындарға ие болды. Осындай жетістік арқылы мектептің білім беру деңгейінің жоғары екендігін, ұстаздар мен оқушылардың бірлескен күш-жігерінің қорытындысы.

Спорт саласында да жетістіктер аз емес. Аудандық білім қызметкерлерінің спартакиадасында қыздар командасы І орын иеленді. Ұлттық мектеп лигасы аясында жеңіл атлетикадан және «Нашақорлыққа жол жоқ!» атты аудандық эстафеталық жарыстан команда І орын алып, облыстық кезеңге жолдама алды. Спорттық жетістіктер – дене тәрбиесінің, салауатты өмір салтын насихаттаудың, жастардың назарын дене шынықтыру мен спортқа аударудағы үлкен жұмыс.

Жалпы, 2024-2025 оқу жылы білім мен спорт саласында керемет жетістіктерімен есте қалды. Оқушылардың жетістіктері мен жеңістері білім беру жүйесі мен қоғамның дамуындағы маңызды көрсеткіш. Білім мен ғылым, сондай-ақ спорт – жастардың болашағы мен еліміздің ертеңі үшін ұмтылыс болып қана қоймай, ел тәуелсіздігінің, ұлттық құндылықтардың нығаюында басты рөл атқарады.

Жанқожа батыр атындағы №70 орта мектеп – терең тарихы мен бай дәстүрі бар, еліміздің білім беру жүйесінде көшбасшылар қатарында. Болашаққа бағытталған мектеп стратегиясы, заманауи білім берудің инновацияларымен үйлесе отырып, оқушылардың жан-жақты дамуына мүмкіндік беруде. Мұнда тек пәндік білім берумен шектелмей, оқушылардың жеке тұлғалық қабілеттерін ашуға, шығармашылық және сыни ойлау дағдыларын дамытуға, әлеуметтік ортада белсенді болуға барынша назар аударылады.

Мектеп ұжымы білім беру саласында жетекші рөль атқарып, Тәуелсіз Қазақстанның нарықтық экономикасына қажетті білікті кадрларды дайындауын тоқтатпақ емес. Ондаған жылдар бойы жоғары дәрежелі мамандарды даярлап, білім берудің заман талабына сай жаңартылуын қамтамасыз етуде. Осыған орай, Жанқожа батыр атындағы №70 орта мектеп алдағы уақытта да елінің мүддесі үшін қызмет ете отырып, талантты, білімді, сауатты ұрпақ тәрбиелейтіні сөзсіз.

Қорыта айтқанда, Жанқожа батыр атындағы №70 орта мектеп – өзінің бай тарихы, мәдениеті мен дәстүрлерімен мақтана алатын, Қазақстанның білім беру жүйесінде орнықты роль атқараcontinue беретін әрі білім мен мәдениеттің ошағы болып қала береді. Мектептің рухы мен мұрасы, ұрпақтар арасындағы байланысты нығайта отырып, білімнің шекарасыз әлемінде алдағы ауқымды міндеттерді орындауға дайын тұрады.