Қазалыда «Таза Қазақстан» экологиялық акциясы аясында сенбілік өтті
Қазалы ауданында «Таза Қазақстан» экологиялық акциясы аясында ауқымды санитарлық тазалық жұмыстары ұйымдастырылды.Таңғы сағат 09:00-ден бастап аудан аумағындағы барлық елді мекендерде сенбілік жұмыстары жүргізіліп, көшелер мен аяқ су арықтары тазартылды. Сондай-ақ, Әйтеке би кентінің шет аймақтарындағы бей-берекет жатқан қоқыстар арнайы полигондарға шығарылды.
Тазалық акциясына аудан бойынша 140 мекемеден 5900 адам мен 22 техника жұмылдырылып, нәтижесінде 12,5 тонна қоқыс шығарылды. Әйтеке би кентінде 3000-ға жуық тұрғын белсенділік танытса, ауылдық округтерден де тұрғындар сенбілікке атсалысты.
Сенбілік жұмыстарының барысын аудандық мәслихат төрағасы Ғазиз Әліш пен аудан әкімінің орынбасары Мұрат Әбсұлтанов аралап көріп, жауаптыларға тазалық жұмыстары бойынша бірқатар тапсырмалар берді.
