Аудан ажары арта түспек
Аудан орталығында халыққа қолайлы орта қалыптастыру, инфрақұрылымды жаңарту және тарихи нысандардың айналасын заманауи талаптарға сай келтіру бағытындағы жұмыстар жүйелі түрде жүргізіліп келеді. Соның айқын көрінісі – теміржол вокзалы аумағындағы ауқымды абаттандыру жұмыстары.Қазіргі таңда вокзал маңында жолаушылар мен тұрғындарға қолайлы жағдай жасау, аумақтың санитарлық және эстетикалық деңгейін көтеру мақсатында бірқатар іс-шаралар атқарылуда. Абаттандыру аясында вокзал алдындағы Әйтеке би ескерткішінің маңы, жаяу жүргіншілер жолдары жаңартылып, заманауи үлгідегі, эстетикалық тұрғыдан үйлесімді қоршаулар мен аялдамалар орнатылуда.
Аудан әкімі Алмасбек Есмаханов аталған аумақты арнайы аралап, жүргізіліп жатқан жұмыстар барысымен танысты. Әкім жұмыс сапары барысында бірқатар кемшіліктерге назар аударып, оларды шұғыл түрде түзету туралы нақты тапсырмалар берді. Сонымен қатар, мердігер мекеме – «СтроймодульАстана» ЖШС-нің өкілдеріне ауа райының қолайлы кезеңін тиімді пайдаланып, белгіленген жұмысты сапалы әрі уақытылы аяқтау міндеттелді.
Айта кету керек, бүгінде 120 жылдық тарихы бар теміржол вокзалы да қайта жаңғыртылуда. Сонымен қатар, теміржол үстінен өтетін жаяу жүргіншілер көпірі де қайта салынып, заманауи стандарттарға сай бейімделуде.
А. ҚУАНТҚАНҚЫЗЫ
