Гандбол алаңындағы тартыс түйінделді

Сәрсенбінің сәтінде ауданда гандболдан облыс чемпионатының XII айналымының қорытынды марапаттау рәсімі салтанатты түрде өтті.
Аудан орталығындағы заманауи «Әмір Арена» спорт кешені бұл күні спорт сүйер қауымға лық толды. Жиналғандар бірнеше күнге жалғасқан тартысты бәсекенің қорытынды сәтіне куә болды. Шараға аудан әкімінің орынбасары Дәурен Тлеумбетов қатысып, облыс чемпионатында үздік нәтиже көрсеткен командалар мен спортшыларды құттықтады.

Өз сөзінде ол Мемлекет басшысы Қасым-Жомарт Тоқаевтың, облыс әкімі Нұрлыбек Нәлібаевтың спорт саласын дамытуға бағытталған қолдау шараларына тоқталып, соңғы жылдары Қазалы ауданында бұқаралық спорт пен кәсіби спорттың дамуы жолында оң өзгерістер орын алып келе жатқанын атап өтті.

Салтанатты шара барысында Қазақстан Республикасының еңбек сіңірген жаттықтырушысы, Қызылорда облыстық гандбол федерациясының президенті Вячеслав Ким де сөз алып, чемпионаттың Қазалы жерінде жоғары деңгейде өткенін ерекше атап өтті. Ол аудан әкімі Алмасбек Есмахановқа ұйымдастырушылық қолдауы үшін алғыс білдіріп, Қазақстан Республикасы Гандбол федерациясының Президенті Гүлнар Тұрлыханованың атынан «Құрмет грамотасын» табыстады.

Осыдан кейін чемпионаттың жабылу рәсімі марапаттау бөліміне ұласты. XII айналымның қорытындысы бойынша бірінші орын Қызылорда командасына бұйырды. Ал екінші орындыЖаңақорған ауданының гандболшы қыздары еншіледі. Ал үздік үштіктің қатарын Қазалы командасы толықтырды. Сонымен бірге турнир барысында ерекше ойын өрнегін көрсеткен спортшылар мен төрешілерге «Үздік шабуылшы», «Үздік қорғаушы», «Үздік қақпашы», «Үздік бапкер» секілді арнайы номинациялар табысталды.

Айта кету керек, гандболдан облыс чемпионатының қорытынды шарасы бұған дейін жыл сайын Қызылорда қаласында өткізіліп келген болатын. Биыл алғаш рет Қазалы ауданында ұйымдастырылуы – аудан спортшыларының әлеуетін арттыруға, жасөспірімдердің спортқа қызығушылығын көтеруге жасалған маңызды қадам ретінде бағалануда.