Өнерлі өрендер
Жуырда Қазалы аудандық мәдениет және тілдерді дамыту бөлімінің қолдауымен, Бозкөл ауылдық мәдениет үйінің ұйымдастыруымен халық батыры, даңқты қолбасшы – Жанқожа Нұрмұхаммедұлының 250 жылдығы аясында әншілер байқауы өтті.
«Әнім сенсің, туған жер!» атты аудандық патриоттық әндер байқауға 13-17 жас аралығындағы өнерпаздар қатысты. Жас әншілер байқауын ұйымдастырушылар мақсаты балғындардың үйірмеге қызығушылығын арттырып, жас өнерпаздарды халыққа танытып, жастардың шығармашылығын насихаттау болды. Байқауға ауылдық клубтар мен ауылдық мәдениет үйлерінен он екі талапкер қатысты.
Өнер додасына қатысушыларға Роза Бағланова атындағы аудандық мәдениет орталығының балалармен жұмыс жөніндегі әдіскері – Балқыз Әділбекқызы мен №18 Ақкөгершін бөбекжай балабақшасының музыка жетекшісі – Набат Иманғалиева және №96 Қарасақал Ерімбет атындағы мектептің әлеуметтік педагогы, музыка маманы – Дәурен Өтенизов жас әншілерге әділ бағасын берді.
Әділқазылар шешімі бойынша байқаудың бас жүлдесін Қазалы қаласынан келген Ақерке Қылышбай жеңіп алды. Бірінші орынды лақалылық Айнамкөз Жанұзақ иеленді. Ал екінші орынға тасарықтық Наз Шахмерден мен Ақтан батыр ауылынан келген Ельдар Тойбазар жайғасты. Сонымен қатар үшінші орын кәукейлік Нұрмұхаммед Алданбай, өркендеулік Ақбота Саха және ақсуаттық Ырысалды Дәрменоваға бұйырды. Басқа да талапкерлерге ауылдық мәдениет үйінің дипломы мен ақшалай сыйлықтары табысталды.
Серік АҚМЫРЗА
