Шетелдік маркетплейстер ҚҚС төлеуге міндетті, әйтпесе... Кірістер комитеті шартты атады
Фото: depositphotos.comШетелдік маркетплейстер Қазақстанда тіркеліп, ҚҚС төлеуге міндетті, әйтпесе олар жұмыс істей алмайды. Бұл туралы Мемлекеттік кірістер комитеті мәлімдеді, - деп хабарлайды Massaget.kz.
ҚҚС әкімшілендіру басқармасы басшысы Еділ Әзімшайықтың айтуынша, ҚҚС-ны қазақстандық сатып алушылар емес, шетелдік маркетплейстердің өздері төлейді.
"Бұл шетелдік компанияларға қатысты. Олар Қазақстанда тіркелуі керек, сот жүйесі арқылы емес, шартты түрде. Біз арнайы тізім енгіземіз, оған кіретіндер бюджетке ҚҚС төлейді. Шетелдік компаниялар салықты айына бір рет, келер айдың 20-сына дейін төлейді", - деді ол.
Яғни шетелдік интернет платформа тіркеуден өтпесе және ҚҚС төлемесе, ол Қазақстан аумағында жұмысын жалғастыра алмайды. Осылайша сайт қазақстандық азаматтар үшін бұғатталуы мүмкін.
