Айнұр олжалы оралды

Кітапханашылардың беделін арттыруға және олардың дамуын ынталандыруға бағытталған бұл додада еліміздің 18 облысынан ең үздік кітапханашылар бас қосып, өз кәсібіндегі шеберлігін ортаға салды. Мұндай үлкен бәсекеде екінші орын алу – нағыз ерлікке пара-пар жетістік. Біз Айнұрды жетістігімен қуана құттықтап, жарыстың әсерімен бөлісуін өтінген едік.

Әлі күнге толқынысын жасыра алмай, шабытты көңіл күймен әңгімесін бастаған Айнұр жарыс барысын былайша баяндап берді.

– Бастапқыда бізге «Ұлттық кітапхана» тақырыбында эссе жазу тапсырылды. Кейін үй тапсырмасы ретінде 2 минуттық бейнеролигімізді қорғап, төрт жобалық идеямды ұсындым. Шынымды айтсам, дайындыққа уақыт аз болды. Қатысатынымды қазан айының басында ғана білдім. Басқа қатысушылар екі айға жуық дайындалған екен. Соған қарамастан бар білімім мен тәжірибемді жұмсап, өзімді барынша көрсетуге тырыстым, – дейді ол.

Жарыс барысында Айнұр ерекше табандылық танытып, соңғы турда бар сұраққа мүдірмей жауап беріп, қазылар алқасының жоғары бағасына ие болған.

– Соңғы кезең маған сәттілік сыйлады. 20 сұрақтың барлығына дұрыс жауап бердім. Ұйымдастырушылар да жауаптарымның толықтай дұрыс екенін атап өтті. Әрине, сайыс барысында эмоция, қобалжу, толқу болды. Бірақ он жыл бойы жинаған тәжірибемнің пайдасы тиді. Артымда сенім артқан ұжым тұрғанда, мен тек алға ұмтылуға тиісті едім, – дейді кейіпкеріміз.

Айнұр Әбілтаева бұған дейін де бірнеше мәрте ірі сайыстарда топ жарып, түрлі марапаттарға ие болған. Ол «Рухани Қазына» байқауында 500 мың теңге жүлде ұтып, 2021 жылы ҚР Мәдениет және спорт министрлігінен марапат алған. Ал облыстық деңгейдегі жарыстарда көбіне бас жүлдені алып жүргені көпшілікке мәлім.

Алматыдағы жарыста екінші орынға ойысса да, Айнұр өз жетістігіне тәубе етіп, ерекше әсермен елге оралды.

– Жерлестерімнің қолдауын ерекше сезіндім. Әсіресе, Ұлттық музейде қызмет ететін сырбойылықтар сахнаға шыққан сәтімде қолпаштап, жігерлендірді. Сол сәт әлі санамда тұр, – дейді ол толқыныспен.

Бүгінде Айнұр өзіне артылған сенімді ақтап, ауданның ғана емес, облыстың намысын лайықты қорғап шықты. Ол үшін бұл жетістік– келесі биікке жетелейтін жаңа мотивация.

«Әріптестерім мені үлкен үмітпен шығарып салған. Облыстың атынан қатысқан соң, жауапкершілікті терең сезіндім. Еншімізге екінші орын бұйырды, оған да ризамын. Бұл – келесі жолы бірінші болуға шабыт беретін үлкен тәжірибе», – дейді Айнұр күлімдеп.

Иә, кітапханашылар – руханияттың ұйытқысы, ал олардың еңбегін ел танып, бағалап жатса, мәдениетке деген биік құрметтің белгісі. Қазалық кітапханашы қыз Айнұр Әбілтаева – осы жолда талмай еңбек етіп, өз кәсібінің абыройын асқақтатып жүрген нағыз жанкешті маман. Осы орайда, жерлесімізді жүлдесімен тағы мәрте құттықтап, жеңісті жолы жалғасын тапсын деп тіледік.