Қазалыда Конституция күні тойланды

Қазалы ауданының жұртшылығы Конституция мерекесін кең көлемде атап өтті. Бұл күні айбыны асқақ Ата заңның қасиеті мен маңыздылығы дәріптелді.

Ата Заңымызда көрсетілген мемлекетіміздің басты құндылықтары – бостандық, еркіндік, тәуелсіздік. Осылайша ел азаматтарының құқығын бірінші кезекке қоятын Конституциямызға биыл 23 жыл толып отыр.

Мерейлі мерекеде Р.Бағланова атындағы мәдениет орталығында айбынды Ата заңымызды ұлықтауға арналған «Ата Заңым - айбарым» атты салтанатты кеш өтті.

Айтулы шарада Қазалы ауданының әкімі М.Ергешбаев аудан тұрғындарын құттықтап, заң талаптарын мүлтіксіз орындау – еліміз үшін өте маңызды екенін атап көрсетті.

Салтанатты мереке соңында аудан өнерпаздары әуезді ән шырқап, күмбірлеген күйі төкті.