Ата Заң – тұғырлы тірек
Жуырда Әйтеке би кентіндегі «Руханият орталығында» Қазақстан Конституциясының 30 жылдығына арналған ерекше танымдық шара өткізілді. «Елдіктің асыл тірегі – Ата Заң» атты шараға «Қазақ соқырлар қоғамы» Қазалы аудандық филиалының мүшелері белсенді түрде қатысты. Оған жергілікті тұрғындар мен мәдениет саласының өкілдері де тартылып, Конституцияның қоғамдағы орны мен маңыздылығы кеңінен талқыланды.Шараны кент әкімінің орынбасары Олжас Ахметов ашып, барша қатысушыларды мерекемен құттықтады. Ол Қазақстан Конституциясының 30 жылдық мерейтойының еліміз үшін маңызы ерекше екенін атап өтті. «Бұл құжат – елдің дамуы мен тұрақтылығының кепілі. Ата Заң арқылы біз өз құқықтарымызды білеміз және оларды қорғауға мүмкіндік аламыз», – деді ол.
Басқосу барысында қатысушылар тақырып аясында ой-пікірін бөлісті. Олардың қатарында Қияс Әлімжан, Жұбатқан Таңжанов, «Қазақ соқырлар қоғамының» өкілі Болат Байділдәұлы мен Мәдина Мадиярқызы болды. Сондай-ақ кәсіпорын директоры Малдыбаева Мөлдір Өтепбергенқызы да өзінің құттықтау сөзін жеткізді.
Кенттік кітапхана қызметкері Гүлназ Өтеп «Ата заң – тәуелсіз ел тұғыры» атты кітап көрмесін ұйымдастырып, оның маңыздылығы жайлы тыңғылықты баяндама жасады. Бұл көрме Конституцияның мазмұнын түсінуді жеңілдетіп, оқырмандардың заңға деген құрметін арттыруға бағытталған.
Жиын Рақымжан Мақсатбаевтың «Қазақстаным» әнімен жалғасты. Ал шара соңында Әйтеке би кенті әкімінің міндетін атқарушы Уәлихан Ихласов қатысушыларға ризашылық білдіріп, бірқатар азаматтарға алғыс хаттар табыстады.
Е. КЕУЛІМЖАЙ
