Көлеңкелі экономикаға қарсы іс-қимыл мәселелері талқыланды
Сурет: akorda.kzМемлекеттік кеңесші Ерлан Қариннің төрағалығымен Президент жанындағы Сыбайлас жемқорлыққа қарсы іс-қимыл мәселелері жөніндегі комиссияның отырысы өтті.
Жиында Көлеңкелі экономикаға қарсы іс-қимыл жөніндегі іс-шаралардың 2023–2025 жылдарға арналған кешенді жоспарын жүзеге асыру барысы қаралды. Отырыста Кешенді жоспарды жүзеге асыруға қатысты қабылданған шаралар туралы Қаржылық мониторинг агенттігі, Жоғары аудиторлық палата, Стратегиялық жоспарлау және реформалар агенттігі, Қаржы министрлігі басшылығының баяндамалары тыңдалды.
Мемлекеттік кеңесші Кешенді жоспардың тиісті тармақтарын сапалы орындаудың маңыздылығына назар аударды. Сондай-ақ көлеңкелі экономикаға қарсы іс-қимыл саласындағы жаңа бағдарламалық құжаттарды дайындау кезінде талдамалық жұмысты күшейтудің өзектілігіне тоқталды.
Комиссия талқылау қорытындысын ескере отырып, нақты ұсыныстар әзірледі. Мемлекеттік кеңесші Ерлан Қарин бірқатар нақты тапсырма берді. Тапсырмалардың орындалу барысы бақылауға алынды.
egemen.kz
