Батыс Қазақстанда 1 300-ден астам адам қызылшамен ауырған
Батыс Қазақстан облысында өткен жылы 1 302 адамның қызылшамен ауырғаны тіркелді.
Фото: iStockБҚО санитариялық-эпидемиологиялық бақылау департаменті басшысының орынбасары Нұрлыбек Мұстаевтың Kazinform тілшісіне мәлім еткеніндей, бұл көрсеткіш 2023 жылмен (477) салыстырғанда, 2,7 есеге өскен.
Оның сөзіне қарағанда, қазіргі таңда эпидемиологиялық жағдай тұрақталып келеді.
- Науқастардың 822-сі немесе 63,1 пайызы – 14 жасқа дейінгі балалар. Ал 164-і немесе 12,5 пайызы – 1 жасқа дейінгі сәбилер. Қызылша облыстың барлық ауданында тіркелді. Оның басым бөлігі Орал қаласында, мұнда облыстық көрсеткіштен жоғары, - дейді Н.Мұстаев.
Департамент басшысы орынбасарының айтуынша, қызылшаның өсуі мен таралуының негізгі себебі – медициналық қарсы көрсетілімдер мен профилактикалық егуден бас тартудың салдарынан тұрғындардың иммундық қабілетінің төмендеуі. Қызылшаға күдікті жағдайлардың бәрі зертханалық тексеріліп, барлығы сол жолмен расталды.
Маманның мәлімдеуінше, қызылша – ауа жолы арқылы өте жылдам таралатын вирусты жұқпалы аурулардың бірі. Вирус сыртқы ортаға ауырған адам сөйлегенде, жөтелгенде, түшкіргенде, түкірікпен бөлінеді. Инкубациялық кезеңі жұқтырғаннан кейін бірінші белгілері пайда болғанға дейін, яғни 7 күннен 14 күнге дейін созылады. Дерт суық тию белгілерімен басталады. Дене қызуы 38-40 градусқа көтеріліп, әлсіздік пайда болады. Адамның тәбеті болмай, жөтеліп, мұрны бітеледі.
- Қызылшаның алдын алудың ең тиімді, сенімді және баламасыз жолы вакцинация екенін еске саламыз. Қызылшаға қарсы егу – вирусты жасанды жолмен тоқтату, нәтижесінде ағза өзін қорғайтын иммунитет қалыптастырады. Ең алғашқы вакцинация балаларға 12-15 айлығында, екіншісі 6 жаста жасалады. Егу тұрақты иммундық қорғанышты қалыптастырады. Науқаспен қарым-қатынаста болған 30 жасқа дейінгілер қосымша егіледі, - деді Н.Мұстаев.
Еске сала кетейік, бұдан бұрын Батыс Қазақстанда 300-ден астам адамның туберкулезге шалдыққанын жазған болатынбыз.
