«Агробиржа» кәсіпкерліктің өрісін кеңейтеді

Диқан үшін ең қиын мәселе өсірген өнімін тиімді бағаға сату екендігі белгілі. Маркетинг мәселесі әлсіз болғандықтан жоспарланбай егілген өнім нарық сұранысынан көп болған жағдайда шаруаларды сансыратып жібереді.

Мәселен, кей жылдары пияз өте тиімді болады. Пияз еккендердің мелдектеп пайдаға шыққанын көрген шаруалар келер жылы басқа дақылын жиып қойып, пияз егіп, нәтижесінде шығарған шығынының да орнын жаба алмай, шақшадай басы шарадай болып өкініштен сан ұрып қалған жағдайлар бар. Кей жағдайда кетпенін жерге ұрып, қаладан кәсіп іздеп жататындары да кездеседі. Осылайша, қаладағы жұмыссыздардың қатарын толтырады. Үкімет шаруаларды осындай тығырықтан шығарудың жолын үнемі іздестіріп келеді. Өңірлерде де қал-қадірінше жақсы жаңалықтар дүниеге келіп жатыр. Соның бірі, Қызылорда облысында ауыл шаруашылығы басқармасының бастамасы бойынша ауылшаруашылық өнімдерін, тұқымдарды, ауыл шаруашылығы техникаларын, тыңайтқыштарды, химиялық заттарды сатып алуға, сатуға немесе айырбастауға және қызметтерді пайдалануға болатын «Агробиржа» интернет-ресурсы құрылды. – Азық-түлік тауарлары бағасының өсуіне ықпал ететін факторлардың бірі – делдалдардың көптігі екені ешкімге жасырын емес. Сарапшылардың пікірінше, олар 65-85 процентті құрайды. Бұл бұрмаланған баға мен бағаны негізсіз көтеруге алып келеді. Осы мақсатта біз «Агробиржа» ауылшаруашылық өнімдерінің саудасына арналған электронды платформа құрдық. Бұл сатылым нарығын кеңейтуге, сатып алушы мен сатушы арасындағы тікелей байланысты орнатуға, экспорттық операцияларды арттыруға мүмкіндік береді, – дейді Қызылорда облысының ауыл шаруашылығы басқармасының бастығы Бақыт Жаханов. Қызылорда ауыл шаруашылығы басқармасының бастамасы республикада да жақсы қолдау тауып отыр. Ауыл шаруашылығы вице-министрі Гүлмира Исаева осындай агробиржа құру тәжірибесін басқа өңірлерге тарату жайын айтады. Агробиржаның веб-сайтындағы ақпарат қазақ, орыс, ағылшын және қытай тілдерінде ұсынылады. Бүгінде Қызылорда облысы ет өнімдерін Иран мемлекетіне экспорттауды бастады. Сондықтан парсы тілінде де ақпарат әзірленбек. Әдетте, диқандар мен шаруалардың өндірген өнімін базар жағалаған делдалдар шөп басын сындырмай көтерме бағамен сатып алып кететін. Үстіне өз үстемесін қойып, екі жеп биге шығып келді. Тыңайтқыш, ауыл шаруашылығы техникаларын сату мәселесі де ортада есеп айыратындардың көмегі арқылы жүзеге асырылатын. «Агробиржа» енді шаруаларға бар керегін тауып беріп қана қоймай, еңбексіз мал табатындардың да жолын кеседі.