Қазақстанда ІТ мамандардың орташа жалақысы 673 мың теңгеге жетті – үкімет
Фото: Артем Чурсинов/BAQ.KZБҰҰ бағалауы бойынша Қазақстан цифрландыру саласында ілгері жетістіктерді көрсетіп отыр. Мұндай мәлімдемені ел үкіметі таратты, деп хабарлайды Ulysmedia.kz.
ЦИФРЛАНДЫРУ
Қазақстан цифрландыру бойынша 193 мемлекет арасында 24-ші орында, сондай-ақ онлайн-қызметтер индексі бойынша 10 көшбасшының қатарына кіреді. Бүгінде интернет арқылы мемлекеттік қызметтерге қол жеткізу 92%-ға жеткен.
САЛАДАҒЫ ЖАЛАҚЫ
“2024 жылы Қазақстанның IT-саласы қарқынды өсімді көрсетті. IT-компаниялардың саны 18 683-ке жетті. Соңғы үш жылда 16% өсім. Сонымен қатар IT-мамандарға сұраныс артып келеді. Қазіргі уақытта IT-саладағы жұмыспен қамту 12%-ға артып, 187 мың адамға жетті. Бұл саладағы орташа айлық жалақы 2024 жылы 54%-ға өсіп, 673 мың теңгеге жетті” делінген хабарламада.
БАҒДАРЛАМА
Үкімет сондай-ақ жеке IT-мектептерді ынталандыру арқылы 2025 жылға қарай 20 мың IT-маман даярлауға бағытталған Tech Orda бағдарламасы іске қосылғанын, бүгінгі таңда олар ақпараттық технологиялар саласында 16 мыңнан астам сарапшы дайындағанын атап өтті.
