Екі күнге созылған саммитте Бразилия төрағалығын аяқтап, Оңтүстік Африка Респуб­ли­ка­сы­на эстафетаны ресми түрде тапсырды. Форумда негізінен кедейлік пен теңсіздікке қар­сы күрес, энергетикалық ауы­су, сондай-ақ жаһандық халықара­­­лық институттарды (БҰҰ, ХВҚ және ДСҰ) реформалау мәсе­лелері талқыланды. Іс-ша­ра­ға барлығы 42 ел қатысты, G20-ның тұрақты мүшелерінен басқа Ангола, Боливия, Мысыр, БАӘ, Малайзия және Вьетнам өкілдері шақырылған. Биыл Ресей делегациясын Сыртқы істер министрі Сергей Лавров,­ Қытай делегациясын Си Цзинь­пин басқарды. Бразилияға АҚШ президенті Джо Байден, Ұлыбритания премьер-ми­нистрі Кир Стармер, Франция президенті Эммануэль Макрон, Германия канцлері Олаф Шольц, Түркия президенті Ред­жеп Тайип Ердоған және Еуро­комиссияның басшысы Урсула фон дер Лейен келді.

Саммит қорытындысы бо­­йынша көшбасшылар 85 тар­мақтан тұратын Бірлескен ком­мюникеге қол қойды, екеуі­ Украи­на мен Таяу Шы­ғы­с­тағ­ы қақ­тығыстарға арнал­ған.­ Қатысушы елдердің бар­лығы да 2015 жылы БҰҰ кли­мат­тың өзгеруі жөніндегі кон­ференциясының (COP28) қорытындылары бо­йынша әзірленген БҰҰ-ның тұрақты даму мақсаттарына, Париж келісіміне сәйкес таза және қолжетімді энергетикаға көшу­ді жеделдетуге міндет алды. Алай­да құжатта қазба оты­ны­нан бас тарту жоспарлары ту­ра­лы айтылмайды. Негізі халық­аралық институттардың рефор­маларына арналған қоры­тын­ды коммюнике бөліміндегі мәсе­лелер көбіне БРИКС ұсы­ныс­тарымен сәйкес келеді дейді Bloomberg сарапшылары. G20 көшбасшылары Африка, Латын Америкасы және Азия елдерін қосып, БҰҰ Қауіпсіздік Кеңесінің құрамын кеңейтуге шақырды. Олар сондай-ақ мемлекеттер арасындағы дауларды шешудің тиімді жұмыс істейтін жүйесін құру мақсатында ДСҰ-ны ре­фор­­малауға ұсыныс білдірді.

Саммит аясында Бразилия­ның бастамасымен аштық пен кедейлікке қарсы жаһандық альянс құрылатын болды. Форум­ның ашылуында Бра­зи­лия президенті Лула да Силва, БҰҰ Азық-түлік және ауылшаруашылық ұйымының деректеріне сілтеме жасай отырып, 2024 жылы әлемде 733 миллион адам аштық пен кедейлікте өмір сүріп жатқанын атап өтті.

«Аштық пен кедейлік тап­шылықтан немесе табиғи құ­былыстардан туындамайды, бұл – адамзаттың едәуір бөлігін оқшаулауға итермелейтін саяси шешімдердің нәтижесі. Біз бұл апатты тоқтатуымыз керек», деді Бразилия басшысы. G20-ның барлық тұрақты мүшесі, сондай-ақ 26 халықаралық ұйым­да­рды қосқанда 81 ел бұл ұсы­нысты бірден ма­құл­­­даған.

Бразилиялық «Folha de S.Paulo» баспасөзінің мәліме­тін­ше, саммит қарсаңында АҚШ пен оның одақтастарының өкілдері декларация жобасына Ресейдің Украинадағы әрекеттерін айып­тайтын тар­мақ­тарды қосуды талап еткен, ал жаһандық Оңтүстік ел­де­рінің кейбір қа­ты­­су­­шы­лары Израильдің Га­за­­дағы әре­кеттерін сынаған ере­же­лер­ді қосуға шақырған. Таяу Шығыстағы қақтығысқа ар­нал­ған ережеде G20 басшылары БҰҰ Қауіпсіздік Кеңесінің №2735 қарарының талаптарына сәйкес Газа секторында, сондай-ақ Ливанда атысты тоқтатуды бірауыздан қолдайтынын атап өткен. Декларация мәтінінде «палестиналықтардың өзін-өзі анықтау құқығы» және «екі мемлекет» қағидаты бо­йынша жанжалды шешуге деген ұмтылысы енгізілген. Топ жетекшілері Газа секторындағы гуманитарлық жағдайға және Ливандағы қақтығысқа қатты алаңдаушылық білдіріп, ай­маққа гуманитарлық көмек­ті кеңейтуге шақырды. Соны­мен қатар коммюникеде қақты­ғыс­­тарға байланысты барлық мемлекет БҰҰ Жарғысының мақсаттары мен қағидаттарына сәйкес әрекет етуі керек. Атап айтқанда, кез келген мемле­кет­тің егемендігін немесе сая­си тәуелсіздігін бұзатын әрекет­тер­ден аулақ болу керектігі айтылады.

Ал қорытынды коммюникеде Украинадағы қақтығысқа қатысты бір тармақ қана ен­гізілген. Қытай басшысы Си Цзиньпин G20 басшыларын Украинадағы қақтығысты бәсең­детуге көмек қолын созуға ша­қырды.

G20 саммиті қарсаңында «Folha de S.Paulo»-ға жария­лан­ған мақаласында Си Цзиньпин Бразилияның Украинаны реттеу бастамасын халықаралық қауымдастық оң бағалап, қолда­ғанын еске салды. Украинаның өзі G20-ға кірмейді, ал Бразилия тарапы Владимир Зеленскийді саммитке шақырған жоқ.