© Sputnik / Владислав Воднев
Үкімет президенттің ұсынысынан кейін 8 миллион қазақстандықты жалпыға бірдей декларация тапсырудан босатуға шешім қабылдады, деп хабарлайды Sputnik Қазақстан.
Тоқаевтың ұсынысы бүгін үкімет отырысында талқыланды. Қаржы министрлігінің мәліметіне сәйкес, бүгінде автоматтандырылған салықтық бақылау мүмкіндіктері бар. Осыған байланысты келесі кезеңге кіретін азаматтардың активтері мен міндеттемелері туралы декларацияны тапсырудан босату ұсынылды.
Босату рәсімі осы санаттағы жеке тұлғалардың 90 пайыздан астамын қамтиды.
Бұл ретте декларациялауды келесі тұлағаларға қалдыру ұсынылады:
1.мемлекеттік қызметшілер;
2.коммерциялық ұйымдардың, квазимемлекеттік сектордың басшылары мен құрылтайшылары және олардың жұбайлары;
3.Қазақстан Республикасынан тыс жерлерде активтері барларға және 1 жыл ішінде сатып алғандарға;
4.бір жыл ішінде құны 20 000 айлық есептік көрсеткіштен (74 млн теңге) астам сатып алулар жасағандарға;
5.өз бетінше салық салынатын табыс тапқандарға.
Бұдан басқа, азаматтарға ерікті түрде декларациялау құқығы беріледі.
Салықтық бақылауға келетін болсақ, жеке тұлғалардың қолда бар активтерін тіркеу үшін барлық цифрлық дерекқордан, оның ішінде екінші деңгейлі банктерден мәлімет алу тетігі қарастырылады.
Қажетті заңнамалық түзетулер дайындалды.