300 адамға арналған мешіт асханасы ашылды
Қазалы қаласындағы Нұралы мешітінің жанынан көптің қолдауымен салынған 300 адамға арналған мешіт асханасы пайдалануға берілді.Мешіт асханасының ашылу салтанатына аудан әкімінің орынбасары Дәурен Тілеумбетов, аудандық ардагерлер кеңесінің төрағасы Оразғали Бекпанов, Жанқожа батыр атындағы орталық мешіттің бас имамы Нұрдаулет Нәби және демеуші азаматтармен қала тұрғындары қатысты.
Игі шарада аудан әкімінің орынбасары Дәурен Тілеумбетов сөз сөйлеп, көпшіліктің қолдауы мен ауызбіршілігінің арқасында салынған мешіт асханасының ашылуымен құттықтап, ізгі лебізін жеткізді. Сондай-ақ асхана құрылысына белсене атсалысқан бірқатар азаматтарға аудан әкімінің алғыс хатын табыстады.
Сонымен қатар аудандық ардагерлер кеңесінің төрағасы Оразғали Бекпанов пен ауданның бас имамы Нұрдаулет Нәби де сөз алып, игі іске атсалысқан барша азаматқа алғысын айтты.
Алдағы уақытта мешіт асханасы тұрғындарға құдайы ас, ауызашар беру, хатым бағыштау, құран оқыту, ет тарату сынды шараларды мешіт имамдарымен бірге шариғат талаптарына сай, қателіксіз өткізуге мүмкіндік береді.
«ҚАЗАЛЫ» ақпарат
