Осы орайда Әйтеке би кентіндегі 5-ші аймақ азаматтарының ұйымдастыруымен "Қарттарым, аман-сау жүрші" атты мерекелік шара өтті.

Тағылымды шараның басты мақсаты - елді бірлік пен ынтымаққа үндеп, бүгінгі жас буынды ауызбіршілікке шақырып, олардың бойына үлкенді сыйлау, құрметтеу сынды асыл қасиеттерді сіңірту болып табылады.

Әли-Мұса мешітінің алдына өткен шараға аудан әкімінің орынбасары Дәурен Тілеумбетов қатысып, абыз ақсақалдар мен ақ жаулықты әжелерімізге жылы лебізін арнады. Сондай-ақ, мерекелік шараны ұйымдастырушылар мен басқа да қоғамдық жұмыстарға белсене атсалысып жүрген азаматтарға аудан әкімі Мұхтар Оразбаевтың «Алғыс хатын» табыстады.

Мұнан соң аудандық ардагерлер кеңесінің төрағасы Оразғали Бекпанов, ауыл ақсақалдары атынан Ерқосай Қабылов пен Жанұзақ Байниязов және Жанқожа батыр атындағы орталық мешіттің бас имамы Нәби Нұрдаулет сөз алып, бүгінгі жас ұрпаққа өнегелі өсиеттері мен ақыл-кеңестерін айтудан жалықпаған барша ардагерлер қауымына шынайы алғыстарын айтып, төл мерекелерімен құттықтады.

Мерекеге орай ұйымдастырылған тағылымды шара барысында арқан тарту, қол күрес, гір көтеру сынды ұлттық спорт түрлерінен сайыстар өткізіліп, жеңімпаздар арнайы дипломдар мен қаржылай сыйлықтармен марапатталды.