Ведомство жанынан су қорын пайдалану және қорғау, сумен жабдықтау, су бұру және ирригация саласындағы кәсіптік біліктілік жөніндегі салалық кеңес құрылған. Кеңестің ережелері және кәсіптік стандарттарды өзектендіру жөніндегі жұмыс жоспары бекітілген, оның негізінде су саласы мамандарын даярлау жөніндегі білім беру бағдарламалары жаңартылмақ.

Су ресурстары және ирригация министрі Нұржан Нұржігітовтің айтуынша өңірлердегі студенттер су шаруашылығы ұйымдарында өндірістік практикадан өтіп, одан әрі жұмысқа орналасуы үшін ЖОО-лармен ынтымақтастық туралы меморандумдар жасау жоспарланып отыр. Сонымен қатар биылдан бастап кейбір су шаруашылығы қызметкерлерінің жалақысы 25%-ға өсті. «Мұндай іс-шаралар су саласындағы мамандықтардың беделін арттырып, студенттерді магистратура мен докторантурада оқуын жалғастыруға, ал саладағы мамандарды біліктілігін арттыруға, оның ішінде «Болашақ» бағдарламасы бойынша да білімін шыңдауға ынталандыруға тиіс», деді министр.