Тазалық – баршаға ортақ

Бүгіндері аса өзекті проблемалардың қатарына қоршаған ортаны қорғау мен экологиядағы өзекті мәселелер жатады. Осы жағдайға қатысты елде жаппай түрлі ауқымды шара жүзеге асырылып келеді. Табиғат байлықтарын сақтау жер бетінде өмір сүріп жатқан халықтардың өмірі мен қызметін, мемлекеттердің тұрақты экономикалық дамуының және әл-ауқатын арттырудың негізі саналады. Ал қоршаған ортаны, ондағы жасыл желекті аялау, табиғи ресурстарды тиімді пайдалану мен оның байлықтарын сақтау және көркейту әрбір адамзаттың міндетіне кіреді. Туған жерімізді аялау, оны көздің қарашығындай қадірлеу ортақ іс. Бұл бағытта қаншама түсіндірме жүргізіліп, қанша үндеулер айтылғанымен туған мекеніміздің тазалығы көңіл көншітпей тұр.

Осыған орай жақында аудан орталығы – Әйтеке би кентінде, шет аймақтарында және ауылдық жерлерде сенбілік жұмыстары ұйымдастырылды. Жанқожа баба кесенесінің аумағы, Достық, Ғ.Мұратбаев, Р.Бағланова, Михайлюк көшелері және кенттің сырт жағындағы «Водокачка елді мекеніне барар жол», «Қазақ қорымы» аумағында қоқыстарды тазалау жұмыстары жүргізілді.
Батыс Еуропа – Батыс Қытай автодәлізінің жол шетіндегі бей-берекетсіз шашылған қоқыстар жиналды. Нәтижесінде 31,6 тонна қоқыс және 26,9 тонна тұрмыстық қатты қалдық арнайы орынға шығарылды. Сенбілікке аудан әкімі Мұхтар Оразбаев арнайы шығып, аудан тазалығы баршамызға ортақ міндет екенін жеткізді.

Қазалы ауданы әкімдігінің баспасөз қызметі

Жаңалықтар

28 қараша 2023 ж. 446 0