Балалар әдебиетінің бәйтерегі

Жақында аудандық балалар кітапханасының ұйымдастыруымен Қазақстанның халық жазушысы, ҚР Мемлекеттік сыйлығының лауреаты, көрнекті ақын Мұзафар Әлімбаевтың туғанына 100 жыл толуына орай, «Балалар әдебиетінің бәйтерегі» атты жыр сағаты өтті.

Сегіз қырлы, бір сырлы қаламгер, алпыс жылдан астам уақыт әдебиет майданында жемісті еңбек еткен. Сонымен қатар балалар әдебиетінің ұясы атанған «Балдырған» журналын 25 жылдан астам уақыт басқарған ақынның өнегелі өмірі мен шығармашылығын жас жеткіншектерге насихаттау ұйымдастырушылар мақсаты еді.
Шарада Е.Бозғұлов атындағы №249 мектеп-лицейдің 6 «д» сынып оқушылары ақынның өлеңдерін жатқа оқып, ертегіден қойылым көрсетіп, ақынның сөзіне жазылған «Ақмаңдайлым», «Маралдым» әндерін орындап өз өнерлерін көрсетті.
Жүргізуші Ж.Көмекбаева автордың жұмбақтарынан ойын ұйымдастырып, оқушыларға дайындаған тәтті сыйларын тарту етті. Кеш соңында кітапхана директоры И.Назарова Е.Бозғұлов атындағы №249 мектеп-лицейдің қазақ тілі мен әдебиеті пәнінің мұғалімі Г.Есқарақызын және жыр сағатына белсене қатысқан оқырмандарды алғыс хатпен марапаттады.