«Мәдениетті ана – мәдениетті ұлт» жобасы Қазалыда
Қазалыда «Мәдениетті ана – мәдениетті ұлт» республикалық жобасы аясында «Ана – тіршіліктің тірегі» тақырыбында келелі кездесу өтті.Өткен аптада «Ел бірлігі – жаңарған Қазақстанның негізі» тақырыбында облысымызда аймақ басшысының төрағалығымен Қазақстан халқы Ассамблеясының кезекті ХХІV сессиясында аталмыш жобаның маңыздылығы айтылып, жұмысын жүйелі түрде жүргізу тапсырылған болатын.
Осы ретте аудан әкімінің орынбасары Д. Тілеуімбетов қатысушыларды жобаны жандандыру мақсатында жаңа идеялармен бөлісіп, ашық әңгіме алаңын құруға шақырды.
Алғы сөзді ұлттық құндылықтар мен отбасы тәрбиесінің үздік үлгілерін насихаттап жүрген өңірлік Аналар кеңесінің төрайымы Рахима Ахметова алды.
Саясаттағы, бизнестегі, мемлекеттік басқару органдары мен түрлі саладағы іскер әйелдердің басын қосып жүйелі жұмыс жасап жүрген облыстық іскер әйелдер қауымдастығының төрайымы Манат Алмашева, ҚХА жанындағы облыстық Аналар кеңесінің мүшесі Анжела Садықбекова және облыстық Аналар кеңесінің мүшесі Галина Щербакова ұлттық тәрбиенің бастауы саналатын аналар өнегесі, отбасы құндылығы турасында әңгімеледі.
Ал жас ұрпақтың бойына ұлттық құндылықтарды сіңіру, оларды отансүйгіштікке, қазақстандық патриотизмге, толеранттылыққа тәрбиелеуде ассамблея жанынан құрылған Қазалы аудандық Аналар кеңесінің ауқымды жұмысы жайлы аудандық Аналар кеңесінің төрайымы Нафиса Жұма сөз қозғады.
Кездесуде ауданда білім, мәдениет, денсаулық саласында еңбек етіп жүрген нәзік жандылар мен ардагер аналар тұшымды ой-пікірлерін ортаға салды.
Мұнан соң өңірдің, ауданның дамуына сүбелі үлесін қосып, ұрпақ тәрбиесіне ұлттық ұстаныммен қарайтын аналар марапатталды.
