Құрметті аудан тұрғындары мен қонақтары!
«Қызылорда облысында төтенше жағдайды енгізу туралы» Қазақстан Республикасы Президентінің 2022 жылғы 5 қаңтардағы №736 Жарлығына сәйкес, Қызылорда облысының коменданты, облыстық Полиция департаментінің бастығының 10.01.2022 жылғы № 7 бұйрығы негізінде, Қазалы ауданына кіру-шығу автомобильдік тасжолдарына қарулы блок-посттар қойылып, төтенше жағдай уақытында (сағат 23:00-ден 07:00-ге дейін) адамдардың коғамдық орындар мен көшеде жүруіне, оның құралдары қозғалысының еркіндігіне шектеулер қойылды.Бейбіт жиналыстарды, ойын-сауық, спорттық және басқа бұқаралық
іс-шараларды ұйымдастыруға және өткізуге тыйым салынып, құқық қорғау органдарының қызметкерлерімен азаматтардың жеке басын куәландыратын құжаттар, олардың заттары, көлік құралдары тексеріледі.
Қару, оқ-дәрі, жарылғыш заттар, арнаулы құралдар, улы заттар сатуға, алып жүруге тыйым салынып, дәрі-дәрмектің, есірткі және психотроптық заттардың, прекурсорлардың ерекше режимі белгіленді.
Аудан көлемінде азық-түлік дүкендері, дәріханалардың жұмыс уақыты күнделікті сағат 21:00-ден 08:00-ге дейін тоқтатылды. Алкогольдік өнімдерінің сатылуына тыйым салынды. Кафе-барлар, мейрамханалар, қоғамдық моншалар, сауналар, спорттық ұйымдар, ойын-сауық орталықтарының жұмысына тыйым салынып, аудан көлемінде орналасқан қару-жарақ сататын дүкені жабылды.
Баршаңызды ел тыныштығы үшін, төтенше жағдай режимін және қоғамдық тәртіпті сақтауға шақырамын.
Болат КАБИЗОВ
Қазалы ауданы полиция бөлімінің бастығы полиция подполковнигі
